വിശദവിവരങ്ങള് https://ktet.kerala.gov.in ല്
യോഗ്യത നേടുന്നവര്ക്ക് ലോവര് പ്രൈമറി മുതല് ഹൈസ്കൂള് തലംവരെയുള്ള അധ്യാപക നിയമനത്തിനര്ഹത
പരീക്ഷ നാല് വിഭാഗങ്ങളിലായി പരീക്ഷാ കമ്മീഷണറുടെ ആഭിമുഖ്യത്തില് നടത്തും
കേരള ടീച്ചര് എലിജിബിലിറ്റി ടെസ്റ്റിന് (കെ-ടെറ്റ്) ഓണ്ലൈനില് ഡിസംബര് 30 വരെ അപേക്ഷിക്കാം. ഫെബ്രുവരി 21, 23 തീയതികളിലാണ് പരീക്ഷ. കേരളത്തില് ലോവര് പ്രൈമറി, അപ്പര്പ്രൈമറി, ഹൈസ്കൂള് തലങ്ങളില് അധ്യാപകരായി നിയമിക്കപ്പെടാനുള്ള യോഗ്യതാനിര്ണ്ണയ പരീക്ഷയാണിത്. നടത്തിപ് ചുമതല പരീക്ഷാഭവനാണ്. വിശദവിവരങ്ങളടങ്ങിയ വിജ്ഞാപനം https://ktet.kerala.gov.in, https://pareekshabhavan.kerala.gov.in- എന്നീ വെബ്സൈറ്റുകളിലുണ്ട്.
പരീക്ഷ: നാല് കാറ്റഗറികളിലായി ഫെബ്രുവരി 21, 23 തീയതികളില് രാവിലെ 10-12.30 മണിവരെയും ഉച്ചക്കുശേഷം 2-4.30 മണിവരെയും നടത്തും. പരീക്ഷാകേന്ദ്രം ഹാള്ടിക്കറ്റിലുണ്ടാവും.
ലോവര് പ്രൈമറി അധ്യാപകരാകുന്നതിന് കാറ്റഗറി ഒന്നിലും അപ്പര് പ്രൈമറിക്ലാസ് അധ്യാപകരാകുന്നതിന് കാറ്റഗറി രണ്ടിലും ഹൈസ്കൂള് ക്ലാസുകളില് അധ്യാപകരാകുന്നതിന് കാറ്റഗറി മൂന്നിലും ഭാഷാ അധ്യാപകര് (അറബി, ഹിന്ദി, സംസ്കൃതം, ഉറുദു-യുപി തലംവരെ), സ്പെഷ്യലിസ്റ്റ് അധ്യാപകര് (ആര്ട്ട് ആന്റ് ക്രാഫ്റ്റ്, കായിക അധ്യാപകര്) ആകുന്നതിന് കാറ്റഗറി നാലിലും യോഗ്യത നേടണം.
എന്നാല് സി-ടെറ്റ് പ്രൈമറി സ്റ്റേജ് പാസായവരെ കെ-ടെറ്റ് കാറ്റഗറി ഒന്നില് നിന്നും സി-ടെറ്റ് എലിമെടന്ററി സ്റ്റേജ് പാസായവരെ കെ-ടെറ്റ് കാറ്റഗറി രണ്ടില്നിന്നും നെറ്റ്, സെറ്റ്, എംഫില്, പിഎച്ച്ഡി, എംഎഡ് യോഗ്യതകള് നേടിയവരെ കെ-ടെറ്റ് ഒന്ന് മുതല് നാല് വരെ കാറ്റഗറി പരീക്ഷകളില്നിന്നും ഒഴിവാക്കുന്നതാണ്.
കെ-ടെറ്റ് പരീക്ഷാഘടനയും സിലബസും അപേക്ഷിക്കുന്നതിനാവശ്യമായ വിദ്യാഭ്യാസ യോഗ്യതകളും അപേക്ഷിക്കേണ്ട രീതിയുമൊക്കെ വിജ്ഞാപനത്തിലുണ്ട്. ഹയര്സെക്കന്ററി/പ്ലസ്ടു (45% മാര്ക്കില് കുറയരുത്), ടിടിസി/ഡിഎഡ്, നിശ്ചിത ശതമാനം മാര്ക്കോടെ ബിഎഡ്/തത്തുല്യ യോഗ്യതകളുള്ളവര്ക്ക് പരീക്ഷയില് പങ്കെടുക്കാം.
ഫീസ്: ഓരോ കാറ്റഗറി പരീക്ഷക്കും അപേക്ഷാ ഫീസ് 500 രൂപയാണ്. എസ്സി/എസ്ടി/ഭിന്നശേഷി വിഭാഗങ്ങളില്പ്പെടുന്നവര്ക്ക് 250 രൂപ മതി. ക്രഡിറ്റ്/ഡെബിറ്റ് കാര്ഡ്/നെറ്റ് ബാങ്കിങ് മുഖേന ഫീസ്അടയ്ക്കാം. വിജ്ഞാപനത്തിലെ നിര്ദേശങ്ങള് പാലിച്ച് ഓണ്ലൈനില് ഡിസംബര് 30 വരെ അപേക്ഷിക്കാം.
