ഹൈദരാബാദ്: പുഷ്പ 2 പ്രീമിയര് ഷോക്കിടെ തിക്കിലും തിരക്കിലും പെട്ട് മരണം സംഭവിച്ച കേസില് നടന് അല്ലു അര്ജുന് ഉള്പ്പെടെയുള്ള 23 പേര്ക്കെതിരെ കുറ്റപത്രം സമര്പ്പിച്ചു. നടനെക്കൂടാതെ സുരക്ഷാ ജീവനക്കാരും തിയേറ്റര് മാനേജ്മെന്റും ഉള്പ്പെടെയുള്ളവര്ക്കെതിരെ ചിക്കടപ്പള്ളി പോലീസാണ് കോടതിയില് 23 പേരെ പ്രതിചേര്ത്ത കുറ്റപത്രം സമര്പ്പിച്ചത്. കേസ് രജിസ്റ്റര് ചെയ്ത് ഒരു വര്ഷത്തിന് ശേഷമാണ് കുറ്റപത്രം സമര്പ്പിച്ചത്.
അന്വേഷണം പൂര്ത്തിയാക്കിയെന്നും ഇനിയുള്ള നിയമപരമായ നടപടികള് കോടതിയില് തുടരുമെന്നും അന്വേഷണ ഉദ്യോഗസ്ഥന് പറഞ്ഞു. 2024 ഡിസംബര് 4 ന് ചിക്കഡ്പള്ളിയിലെ ആര്ടിസി എക്സ് റോഡിലുള്ള സന്ധ്യാ തീയറ്ററില് രാത്രി 11 മണിയുടെ പ്രീമിയര് ഷോക്കിടെയാണ് അപകടം ഉണ്ടായത്.
അല്ലു അര്ജുന് എത്തിയതിനെത്തുടര്ന്ന് ഉണ്ടായ ജനക്കൂട്ടം ഗേറ്റ് തകര്ക്കുകയും തുടര്ന്നുണ്ടായ തിക്കിലും തിരക്കിലും പെട്ട് എം. രേവതി എന്ന 35 വയസുകാരി കൊല്ലപ്പെടുകയും ഇവരുടെ ഒമ്പത് വയസുള്ള മകന് ശ്രീതേജിന് ഗുരുതരമായി പരിക്കേല്ക്കുകയും ചെയ്തിരുന്നു. തുടര്ന്ന് സെക്കന്തരാബാദ് കിംസ് ആശുപത്രിയില് മാസങ്ങളോളം വെന്റിലേറ്റര് സഹായത്തോടെ തീവ്ര പരിചരണ വിഭാഗത്തില് ചികിത്സയിലായിരുന്നു ശ്രീതേജ്. നാല് മാസത്തെ ചികിത്സയ്ക്ക് ശേഷം 2025 ഡിസംബര് 29- നാണ് ശ്രീതേജ് ഡിസ്ചാര്ജ് ആയത്. നിലവില് ഹൈദരാബാദിലെ ന്യൂറോ റീഹാബിലിറ്റേഷന് സെന്ററില് ചികിത്സയിലാണ് ശ്രീതേജ്.
