ന്യൂദല്ഹി: മോദിയ്ക്കെതിരെ വനിതാ കോണ്ഗ്രസ് നേതാവ് കൊലവിളിമുദ്രാവാക്യം വിളിച്ച സംഭവത്തില് സോണിയാഗാന്ധി രാജ്യത്തോട് മാപ്പ് ചോദിക്കണമെന്ന് ആവശ്യപ്പെട്ട് ബിജെപി ദേശീയാധ്യക്ഷന് ജെ.പി. നദ്ദ. യാതൊരു അടിസ്ഥാനവുമില്ലാത്ത നാടകമാണ് ഇതെന്ന് പറഞ്ഞ് ഈ സംഭവത്തെ നിസ്സാരമാക്കി തള്ളാന് ശ്രമിക്കുന്ന കോണ്ഗ്രസ് നിലപാടിനോട് യോജിക്കാന് കഴിയില്ലെന്ന് ബിജെപി നേതാക്കള് തിങ്കളാഴ്ച പാര്ലമെന്റിന്റെ ഇരുസഭകളിലും ആവര്ത്തിച്ചു.
ദല്ഹിയിലെ രാംലീല മൈതാനത്ത് നടന്ന വോട്ട് ചോരി വിരുദ്ധറാലിയിലാണ് ഈ മുദ്രാവാക്യം വീണ്ടും മുഴങ്ങിയത്. ‘മോദി തേരി ഖബര് ഖുദേഗി’ (മോദി താങ്കളുടെ ശവക്കുഴി തോണ്ടിക്കഴിഞ്ഞു) എന്ന മുദ്രാവാക്യമാണ് ഒരു വനിതാ കോണ്ഗ്രസ് നേതാവ് മുഴക്കിയത്. മോദിയ്ക്കെതിരെ കോണ്ഗ്രസ് പ്രവര്ത്തകര് കൊലവിളി മുദ്രാവാക്യം മുഴക്കിയാല് അതിന്റെ ഉത്തരവാദിത്വം കോണ്ഗ്രസ് പാര്ട്ടിയിലെ തലപ്പത്തിരിക്കുന്ന നേതാക്കള്ക്ക് ഉണ്ടെന്നും അതിനാല് സോണിയാഗാന്ധി തന്നെ ഇതിന് രാജ്യത്തോട് മാപ്പ് പറയണമെന്നാണ് ജെ.പി. നദ്ദ ആവശ്യപ്പെട്ടത്.
ഇത് രണ്ടാം തവണയാണ് മോദിയ്ക്കെതിരെ കൊലവിളി മുദ്രാവാക്യം ഉയരുന്നത്. നേരത്തെ ബീഹാര് തെരഞ്ഞെടുപ്പ് കാലത്ത് രാഹുല് ഗാന്ധി വോട്ട് അധികാര് യാത്ര നടത്തിയപ്പോഴും കൊലവിളി മുദ്രാവാക്യം മുഴങ്ങിയിരുന്നു. അന്നും കോണ്ഗ്രസ് ഇതിനെ നിസ്സാരമാക്കി തള്ളി പ്രശ്നം ആറിത്തണുപ്പിക്കാനാണ് ശ്രമിച്ചത്. പക്ഷെ ഇനി ഇത് ഇങ്ങിനെ വിടാന് പറ്റില്ലെന്ന വാശിയിലാണ് ബിജെപി.
