ന്യൂദല്ഹി: ഭാരതത്തിന്റെ ദേശീയ ഉത്സവമായ ദീപാവലിക്ക് യുനെസ്കോയുടെ സാംസ്കാരിക പൈതൃക പദവി. ചെങ്കോട്ടയിലെ യുനെസ്കോ സാംസ്കാരിക പൈതൃക സംരക്ഷണ സമ്മേളനത്തിലാണ് പ്രഖ്യാപനം. ആദ്യമായാണ് ഇത്തരമൊരു സമ്മേളനത്തിന് ഭാരതം വേദിയാകുന്നത്.
മാനവികതയുടെ അവര്ണനീയ സാംസ്കാരിക പൈതൃകങ്ങളുടെ പട്ടികയിലാണ് ഐക്യരാഷ്ട്ര സംഘടനാ സാംസ്കാരിക വിഭാഗം ദീപാവലിയെ ഉള്പ്പെടുത്തിയത്. പ്രഖ്യാപനമുണ്ടായപ്പോള് സമ്മേളന ഹാളിലാകെ വന്ദേമാതരം, ഭാരത്മാതാ കീ ജയ് വിളികള് മുഴങ്ങി. കേന്ദ്ര സാംസ്കാരിക ടൂറിസം മന്ത്രി ഗജേന്ദ്ര സിങ് ശെഖാവത്തിന്റെ നേതൃത്വത്തിലാണ് പ്രഖ്യാപനത്തെ സ്വാഗതം ചെയ്തത്. പഞ്ചവാദ്യം ഉള്പ്പെടെ വിവിധ ഭാരതീയ കലാരൂപങ്ങളും ഇതേസമയം അവതരിപ്പിക്കപ്പെട്ടു.
ദീപാവലിക്ക് പൈതൃക പദവി ലഭിച്ചതിനെ പ്രധാനമന്ത്രി നരേന്ദ്ര മോദി സ്വാഗതം ചെയ്തു. ഭാരതവും ലോകവും ആവേശഭരിതമാണെന്ന് പ്രധാനമന്ത്രി എക്സില് കുറിച്ചു. ദീപാവലി സംസ്കാരവുമായും ധാര്മികതയുമായും അടുത്തു ബന്ധപ്പെട്ടിരിക്കുന്നു. അതു നമ്മുടെ സംസ്കാരത്തിന്റെ ആത്മാവാണ്. അതു പ്രകാശത്തെയും ധര്മത്തെയും പ്രതിനിധീകരിക്കുന്നു. യുനെസ്കോ പൈതൃക പട്ടികയില് ദീപാവലി ചേര്ക്കുന്നത് ഉത്സവത്തിന്റെ ആഗോള ജനപ്രീതിക്ക് കൂടുതല് സംഭാവനയേകും. പ്രഭു ശ്രീരാമന്റെ ആദര്ശങ്ങള് നമ്മെ എന്നും നയിക്കട്ടെ, പ്രധാനമന്ത്രി കുറിച്ചു.
ഭാരതത്തിനകത്തും പുറത്തും ഏറ്റവുമധികം പേര് ആഘോഷിക്കുന്ന ദീപാവലി തിന്മയ്ക്കുമേല് നന്മ നേടിയ വിജയത്തിന്റെ സൂചനയാണ്. ദീപാവലി സംബന്ധിച്ച് നിരവധി ഐതിഹ്യങ്ങളുണ്ട്.
14 വര്ഷത്തെ വനവാസത്തിനുശേഷം ഭഗവാന് ശ്രീരാമന് അയോദ്ധ്യയില് തിരിച്ചെത്തിയ ദിവസമാണിതെന്നതാണ് അവയില് പ്രധാനം. അയോദ്ധ്യയില് കഴിഞ്ഞ വര്ഷങ്ങളില് നടന്ന ദീപാവലി ആഘോഷങ്ങള് ഗിന്നസ് റിക്കാര്ഡില് ഇടംപിടിച്ചിരുന്നു.
ഭാരതത്തില് നിന്നുള്ള കുത്തിയോട്ടം (2008), മുടിയേറ്റ് (2010), യോഗ (2016), കുംഭമേള (2017), ദുര്ഗാപൂജ (2021), ഗര്ബ നൃത്തം (2023) തുടങ്ങി 15 ആഘോഷങ്ങള് ഇതിനകം യുനെസ്കോയുടെ സാംസ്കാരിക പൈതൃക പദവി നേടിയിട്ടുണ്ട്.
ജന്മഭൂമി ഓണ്ലൈന്