കോട്ടയം: നടിയെ ആക്രമിച്ച കേസില് തെളിവില്ലാത്തതിന്റെ പേരില് ദിലീപിനെ സെഷന്സ് കോടതി കുറ്റവിമുക്തനാക്കുമ്പോള് കേസില് നിര്ണ്ണായക ഇടപെടല് നടത്തിയ അന്വേഷണോദ്യോഗസ്ഥന് പ്രഫുല്ല ചന്ദ്രന്, സംവിധായകന് ബാലചന്ദ്രകുമാര് എന്നിവരുടെ അകാല വിയോഗം ചര്ച്ചയാവുന്നു. ഗൂഢാലോചനക്കുറ്റം ചുമത്തി ദിലീപിനെ അറസ്റ്റു ചെയ്ത ഡിവൈ എസ്പി പ്രഫുല്ലചന്ദ്രന് കഴിഞ്ഞ ഏപ്രിലില് 55 ാംവയസിലാണ് മരിച്ചത്. ദിലീപ് ഗൂഢാലോചന നടത്തിയെന്നതിന് താന് സാക്ഷിയാണെന്ന് വെളിപ്പെടുത്തി രംഗത്തു വന്ന ബാലചന്ദ്രകുമാറാകട്ടെ 52 ാംവയസില് വൃക്കരോഗത്തത്തുടര്ന്നും മരണമടഞ്ഞു.
കേസ് നല്കേണ്ടെന്ന് സിനിമാരംഗത്തുള്ള സുഹൃത്തുക്കളടക്കം ഉപദേശിച്ചപ്പോഴും ഉന്നത പൊലീസ് ഉദ്യോഗസ്ഥരെ വിളിച്ചുവരുത്തി കേസെടുപ്പിച്ച കോണ്ഗ്രസ് നേതാവ് പി ടി തോമസാണ് കേസിനിടെ മരണമടഞ്ഞ മറ്റൊരാള്. തോമസ്പക്ഷെ പ്രതിയായി ദിലീപിന്റെ പേരു പരാമര്ശിച്ചിരുന്നില്ലെന്ന് അടുത്തിടെ വെളിപ്പെടുത്തപ്പെട്ടു.
ദിലീപിനെതിരെ കുറ്റപത്രം സമര്പ്പിച്ച പൊലീസ് ഉദ്യോഗസ്ഥന് ബൈജു പൗലോസിന് അടുത്തിടെ വാഹനാപകടത്തില് കൈ ഒടിഞ്ഞ് ദീര്ഘകാലം ചികില്സയില് കഴിയേണ്ടിവന്നിരുന്നു.
