കോഴിക്കോട്: യുഡിഎഫ് ഭരിക്കുന്ന കോഴിക്കോട് കാരശ്ശേരി ബാങ്കില് ഭരണം പിടിക്കാന് സിപിഎം വഴിവിട്ട നീക്കങ്ങള് നടത്താന് സാഹചര്യമൊരുക്കിയത് കോണ്ഗ്രസിലെ വിഭാഗീയത. കഴിഞ്ഞദിവസം രാത്രിയില് ആരുമറിയാതെ 829 മെമ്പര്മാരെ ബാങ്കില് ചേര്ക്കാനുള്ള സിപിഎമ്മിന്റെ നീക്കം വിവാദമായിരുന്നു.
സംഭവത്തെതുടര്ന്ന് ഭരണസമിതി മരവിപ്പിച്ച്, ബാങ്ക് അഡ്മിനിസ്ട്രേറ്റീവ് നിയന്ത്രണത്തിലാക്കിയിരിക്കുകയാണ്. ബാങ്ക് ചെയര്മാന്റെ പിന്തുണയോടെയാണ് സിപിഎം ഭരണം പിടിച്ചെടുക്കാന് ശ്രമം നടത്തിയത്. കെപിസിസി അംഗം എന്.കെ. അബ്ദുറഹ്മാനാണ് ബാങ്ക് ചെയര്മാന്. അബ്ദുറഹ്മാനെ പാര്ട്ടിയില് നിന്ന് പുറത്താക്കാന് കോണ്ഗ്രസ് ജില്ല കമ്മിറ്റി തീരുമാനിച്ചിട്ടുണ്ട്.
ചെയര്മാന്റെ ഒത്താശയോടെ മെമ്പര്മാരെ ചേര്ക്കാന് തങ്ങളുടെ ഐഡിയും പാസ്വേഡും ദുരുപയോഗം ചെയ്തെന്നാണ് ജീവനക്കാരുടെ പരാതി. സംഭവത്തില് പോലീസ് അന്വേഷണം തുടങ്ങി. യുഡിഎഫ് ഭരണസമിതിയിലെ ഒമ്പത് ഡയറക്ടര്മാര് ഹൈക്കോടതിയെ സമീപിച്ചു. 500 കോടിയോളം നിക്ഷേപമുള്ള ബാങ്ക് ആണ് കാരശ്ശേരി സഹ. ബാങ്ക്. 721 മെമ്പര്മാരാണ് ഇക്കഴിഞ്ഞ വെള്ളിയാഴ്ചവരെ ബാങ്കിലുണ്ടായിരുന്നത്.
ഇന്നലെ രാവിലെ ആകുമ്പോഴേക്കും മെമ്പര്മാരുടെ എണ്ണം 1600 ആയി. അവധി ദിവസത്തില് രാത്രിയിലടക്കം ജീവനക്കാരുടെ ഐഡിയും പാസ്വേര്ഡും ഉപയോഗിച്ച് 860 ഓളം എ ക്ലാസ് മെമ്പര്മാരെ അനധികൃതമായി ചേര്ത്തുവെന്നാണ് സിപിഎമ്മിനെതിരെ യുഡിഎഫ് ആരോപിക്കുന്നത്. നിക്ഷേപങ്ങളെ പോലും ബാധിക്കുന്ന തരത്തിലുള്ള ഗുരുതരമായ കാര്യമാണ് നടന്നതെന്നും ചെയര്മാന് തന്റെ സ്വന്തം ഇഷ്ടപ്രകാരം വ്യക്തിപരമായ നേട്ടങ്ങള്ക്ക് വേണ്ടി പാര്ട്ടിയെ വഞ്ചിച്ച് ബാങ്കിനെ സിപിഎമ്മിന് വില്ക്കാനുള്ള ഗൂഢനീക്കമാണ് നടക്കുന്നതെന്നും യുഡിഎഫ് ആരോപിച്ചു. വിഷയത്തില് കെപിസിസി ഡിസിസിയോട് റിപ്പോര്ട്ട് തേടിയിട്ടുണ്ട്. അതേസമയം, ബാങ്ക് ഇന്നലെ യുഡിഎഫ് പ്രവര്ത്തകര് ഉപരോധിച്ചു. ജീവനക്കാര് അറിയാതെ അവരുടെ ലോഗിന് ഐഡി ഉപയോഗിച്ച് ഒറ്റ ദിവസം കൊണ്ട് എണ്ണൂറിലധികം എ ക്ലാസ് അംഗങ്ങളെ പുതുതായി ചേര്ത്തു എന്നാരോപിച്ചായിരുന്നു സമരം.
13 അംഗ ഭരണസമിതിയിലെ 9 പേരും അറിയാതെയാണ് ബാങ്ക് ചെയര്മാനും ജനറല് മാനേജറും അംഗങ്ങളെ ചേര്ത്തതെന്നും യുഡിഎഫ് നേതാക്കള് ആരോപിച്ചു. ബാങ്കിന്റെ നെല്ലിക്കാപറമ്പ് ശാഖയില് അവധി ദിവസമായ ഞായറാഴ്ച പുലര്ച്ചെ ഒരു മണിക്കും 5 മണിക്കും ഇടയിലാണ് സംഭവം. തങ്ങളറിയാതെ ലോഗിന് ഐഡി ഉപയോഗിച്ച് മെമ്പര്ഷിപ്പ് ചേര്ത്ത സംഭവത്തില് നെല്ലിക്കാപറമ്പ് ബ്രാഞ്ച് മാനേജര് ഷൈജു തോമസും ജീവനക്കാരും മുക്കം പോലീസില് പരാതി നല്കി.
