ആലപ്പുഴ (3-12-2025): ആലപ്പുഴയിൽ സ്വകാര്യ സ്കൂളിലെ വിദ്യാർഥിയുടെ ബാഗിൽ നിന്നും വെടിയുണ്ടകൾ കണ്ടെത്തി. ആലപ്പുഴ കാർത്തികപള്ളിയിലെ സ്വകാര്യ സ്കൂളിലെ എട്ടാം ക്ലാസ് വിദ്യാർഥിയുടെ ബാഗിൽ നിന്നാണ് വെടിയുണ്ടകൾ കണ്ടെടുത്തത്. കൈത്തോക്കിൽ ഉപയോഗിക്കുന്ന രണ്ട് റൗണ്ട് ബുള്ളറ്റുകളാണ് വിദ്യാർഥിയുടെ ബാഗിൽ നിന്നും കണ്ടെടുത്തത്.
സ്കൂൾ അധികൃതർ ഉടൻ തന്നെ വിവരം പോലീസിൽ അറിയിക്കുകയും സ്ഥലത്തെത്തിയ പോലീസ് അന്വേഷണം ആരംഭിക്കുകയും ചെയ്തു. കുട്ടിയെ ചോദ്യം ചെയ്തപ്പോൾ ട്യൂഷന് പോയപ്പോള് സമീപത്തെ പറമ്പിൽ നിന്നാണ് വെടിയുണ്ടകൾ ലഭിച്ചതെന്നാണ് മൊഴി നൽകിയത്. ഇതേ സ്കൂളിലെ ഹൈസ്കൂള് വിദ്യാർഥികളുടെ ബാഗുകൾ പരിശോധിച്ച ഘട്ടത്തിലാണ് കുട്ടിയുടെ ബാഗിൽ നിന്നും വെടിയുണ്ടകൾ കണ്ടെത്തുന്നത്.
വെടിയുണ്ടകള് പോലീസിന് കൈമാറി. ഇത് വിദഗ്ധ പരിശോധനയ്ക്ക് അയക്കുമെന്ന് പോലീസ് അറിയിച്ചു. സ്കൂളിലെ വിദ്യാർഥികൾ ലഹരി വസ്തുക്കൾ കൈവശം വെക്കുകയോ ഉപയോഗിക്കുകയോ ചെയ്യുന്നുണ്ടോയെന്ന് അറിയാനായി അധ്യാപകർ കുട്ടികളുടെ ബാഗുകൾ പരിശോധിച്ച സമയത്താണ് വിദ്യാർഥിയുടെ ബാഗിനുള്ളിൽ നിന്നും വെടിയുണ്ടകൾ കണ്ടെത്തിയത്.
