കോട്ടയം: സ്വകാര്യബസ് ജീവനക്കാരുടെ നിയമലംഘനങ്ങളില് കര്ശന ശിക്ഷ ഉറപ്പ് വരുത്തണമെന്ന് മനുഷ്യാവകാശ കമ്മീഷന് ജുഡീഷ്യല് അംഗം കെ ബൈജുനാഥ് നിര്ദ്ദേശം നല്കി. പൊതു യാത്രാ സുരക്ഷ ഉറപ്പുവരുത്തുന്നതിന് ജില്ലാതലങ്ങളില് പ്രത്യേക നിരീക്ഷണ സമിതികള് രൂപീകരിക്കണമെന്നും കമ്മീഷന് ആവശ്യപ്പെട്ടു. ജൂലായില് കാഞ്ഞിരപ്പള്ളി-ഈരാറ്റുപേട്ട റൂട്ടിലെ ഒരു സ്വകാര്യ ബസ്സില് നിന്ന് ഇറങ്ങുന്നതിനിടയില് വിദ്യാര്ത്ഥിനി അപകടത്തില്പ്പെട്ട സംഭവത്തിന്റെ പശ്ചാത്തലത്തിലാണ് കമ്മീഷന് ഈ നിര്ദേശം നല്കിയത്.നിയമലംഘനങ്ങളോടും അശ്രദ്ധമായ ഡ്രൈവിംഗിനോടും സീറോ ടോളറന്സ് നയം സ്വീകരിക്കണം. ബസ് ഉടമകള്ക്കും ഡ്രൈവര്മാര്ക്കും സുരക്ഷാ ബോധവത്കരണ ക്യാംപെയിനുകള് ജില്ലാതലങ്ങളില് സംഘടിപ്പിക്കണം. പൊതുജനങ്ങള്ക്കും യാത്രക്കാര്ക്കും പരാതി നല്കാന് കൂടുതല് സൗകര്യമൊരുക്കുന്ന ഓണ്ലൈന് സംവിധാനവും ഹെല്പ്പ്ലൈന് സംവിധാനവും ശക്തിപ്പെടുത്തണമെന്നും കമ്മിഷന് നിര്ദ്ദേശിച്ചു.
