കൊച്ചി :വെര്ച്വല് ക്യൂ ബുക്കിംഗ് രേഖകള് കൃത്യമല്ലെങ്കില് പമ്പയില് നിന്നും സന്നിധാനത്തേക്ക് ഭക്തരെ കടത്തിവിടരുതെന്ന് ഹൈക്കോടതി. വിര്ച്വല് ക്യൂ പാസിലെ സമയം ,ദിവസം എന്നിവയും കൃത്യമായിരിക്കണം.
വ്യാജ പാസുമായി വരുന്നവരെ കടത്തിവിടരുതെന്നും ഹൈക്കോടതി നിര്ദേശിച്ചു.ശബരിമലയിലെ തിരക്ക് നിയന്ത്രിക്കാനുളള കര്ശന നിര്ദേശങ്ങളാണ് ഹൈക്കോടതി നല്കിയത്. കഴിഞ്ഞ ദിവസം ശബരിമലയിലെ ഭക്തജനത്തിരക്കില് ഹൈക്കോടതി കടുത്ത അതൃപ്തി പ്രകടിപ്പിച്ചിരുന്നു.മുന്കൂട്ടി അറിയാനാകുന്ന തിരക്ക് മൂലമുണ്ടായ അപകടങ്ങള് അനുവദിക്കാനാകില്ലെന്നും തിരക്കില്പെട്ട് ഭക്തര്ക്ക് അപകടമുണ്ടായാല് ക്ഷമ പ്രതീക്ഷിക്കരുതെന്നും ഹൈക്കോടതി ദേവസ്വം ബോര്ഡിനും പൊലീസിനും മുന്നറിയിപ്പ് നല്കി.
വ്യാഴാഴ്ച രാത്രി പത്ത് മണിവരെ ദര്ശനം നടത്തിയത് തൊണ്ണൂറായിരത്തിന് മുകളില് ഭക്തരാണ്. വെളളിയാഴ്ചയാണ് ശബരിമലയില് 12 വിളക്ക്. ശബരിമല തീര്ഥാടനം സുഗമമായ രീതിയിലാണെന്ന് ദേവസ്വം ബോര്ഡ് പ്രസിഡന്റ് കെ ജയകുമാര് പറഞ്ഞു. ഉച്ചഭക്ഷണമായി സന്നിധാനത്ത് കേരളീയ സദ്യ വിളമ്പുന്നതില് ഉടന് അവലോകന യോഗം ചേരും.തിരക്ക് ഏറിയതോടെ ശബരിമലയില് റെക്കോര്ഡ് വരുമാനമാണ്. ആകെ വരുമാനം 60 കോടി കവിഞ്ഞു. അരവണ വിറ്റു വരവിലൂടെ 30 കോടിയും കാണിക്കയിലൂടെ 15 കോടിയും ലഭിച്ചു. അപ്പം വില്പന, പ്രസാദം മറ്റു വഴിപാടുകള് എന്നിവയിലൂടെയാണ് ബാക്കി വരുമാനം.
