കാസർകോട്: ദേലംപാടി പയറടുക്കയിൽ ബിഎൽഒയെ പഞ്ചായത്ത് അംഗം അസഭ്യം പറയുകയും കയ്യേറ്റം ചെയ്യുകയും ചെയ്തു. ദേലംപാടി എട്ടാം വാർഡ് പഞ്ചായത്ത് അംഗവും സിപിഎം നേതാവുമായ സുരേന്ദ്രനാണ് ബിഎൽഒ അജിത്തിനെ ആക്രമിച്ചത്. ബിവറേജസ് കോർപ്പറേഷനിലെ എൽ ഡി സിയാണ് അജിത്.
ഇന്ന് രാവിലെ ഒമ്പതരയോടെയാണ് സംഭവം. പറയറുക്കയിൽ നടത്തിയ ക്യാമ്പിലാണ് ബിഎൽഒയ്ക്ക് നേരെ ആക്രമണം ഉണ്ടായത്. ഒരു വീട്ടിൽ ഫോം വിതരണം ചെയ്തില്ലെന്ന് പറഞ്ഞായിരുന്നു ആക്രമണം. എന്നാൽ കൃത്യമായി താൻ ഫോം വിതരണം ചെയ്തിട്ടുണ്ടെന്ന് ബിഎൽഒ പറഞ്ഞെങ്കിലും ഇയാൾ ചെവിക്കൊണ്ടില്ല. ഫോം കിട്ടിയില്ലെങ്കിൽ പഞ്ചായത്തിൽ പോയി പുതിയ ഫോം പ്രിൻ്റ് ചെയ്ത് കൊടുക്കാമെന്നും പറഞ്ഞു.
എന്നാൽ ക്ഷുഭിതനായ പഞ്ചായത്ത് അംഗം ബിഎൽഒയുടെ കോളറിന് പിടിക്കുകയും തല്ലാൻ ശ്രമിക്കുകയുമായിരുന്നു. കേട്ടാലറയ്ക്കുന്ന ഭാഷയാണ് പഞ്ചായത്ത് അംഗം ഉപയോഗിച്ചത്. ഇതിനെതിരെ ബിഎൽഒ കളക്ടർക്ക് അടക്കം പരാതി നൽകി. കൃത്യമായ അന്വേഷണം നടത്തുമെന്നും നടപടി സ്വീകരിക്കുമെന്നും വില്ലേജ് ഓഫീസർ അറിയിച്ചു.
