കൊച്ചി: സീബ്രാ ലൈനുകളില് കാല്നടക്കാരെ അവഗണിച്ച് അലക്ഷ്യമായി വാഹനമോടിക്കുന്ന ഡ്രൈവര്മാര്ക്കെതിരെ നടപടി വേണമെന്ന ഹൈക്കോടതി നിര്ദ്ദേശത്തിന്റെ അടിസ്ഥാനത്തില് കേസെടുത്ത് മോട്ടോര് വാഹന വകുപ്പ്. എറണാകുളം ജില്ലയില് നടത്തിയ പരിശോധനയില് വിവിധ നിയമലംഘനത്തിനു 984 വാഹനങ്ങള്ക്കെതിരെ നടപടി സ്വീകരിച്ചു.
ജില്ലയില് അന്യ ജില്ലകളിലെ പെര്മിറ്റ് ഉപയോഗിച്ച് അനധികൃതമായി സര്വീസ് നടത്തിയിരുന്ന 400 ഓളം ഓട്ടോറിക്ഷകള്ക്കെതിരെയും അപകടകരമായ രീതിയില് വാഹനം ഓടിച്ച 15 ഓളം ബസ് ഡ്രൈവര്മാര്ക്കെതിരെയും നടപടിയെടുത്തു. ട്രിപ്പ് കട്ട് ചെയ്ത് സര്വീസ് നടത്താതിരുന്ന 40 ഓളം ബസുകളുടെ പെര്മിറ്റില് നടപടി എടുക്കുന്നതിന് ആര് ടി ഒ ബോര്ഡിലേക്ക് ശിപാര്ശ ചെയ്തു.
ബസുകള് സ്റ്റോപ്പില് നിര്ത്താതെ റോഡിന്റെ നടുക്ക് നിര്ത്തി ഗതാഗത തടസ്സം സൃഷ്ടിക്കുന്ന ഡ്രൈവര്മാര്ക്കെതിരെ നടപടി ഉണ്ടാകുമെന്ന് എന്ഫോഴ്സ്മെന്റ് ആര്.ടി.ഒ അറിയിച്ചു.
