തിരുവനന്തപുരം : കേരള സംസ്ഥാന ചലച്ചിത്ര അക്കാദമി സംഘടിപ്പിക്കുന്ന 30ാമത് കേരള രാജ്യാന്തര ചലച്ചിത്ര മേളയുടെ ഡെലിഗേറ്റ് രജിസ്ട്രേഷന് നവംബര് 25ന് രാവിലെ 10 മണിക്ക് ആരംഭിക്കും.
ഡിസംബര് 12 മുതല് 19 വരെ തിരുവനന്തപുരത്ത് സംഘടിപ്പിക്കുന്ന ഐ.എഫ്.എഫ്.കെയിലേക്ക് registration.iffk.in എന്ന ലിങ്കിലൂടെ ഡെലിഗേറ്റ് രജിസ്ട്രേഷന് നടത്താം.
പൊതുവിഭാഗത്തിന് ജി.എസ്.ടി ഉള്പ്പെടെ 1180 രൂപയും വിദ്യാര്ത്ഥികള്ക്ക് ജി.എസ്.ടി ഉള്പ്പെടെ 590 രൂപയുമാണ് ഡെലിഗേറ്റ് ഫീസ്. പൊതുവിഭാഗം, വിദ്യാര്ത്ഥികള്, ഫിലിം സൊസൈറ്റി, ഫിലിം ആന്റ് ടി.വി പ്രൊഫഷണല്സ് തുടങ്ങി എല്ലാ വിഭാഗങ്ങളിലേക്കും ഓണ്ലൈനായി രജിസ്ട്രേഷന് നടത്താം. നേരിട്ട് രജിസ്റ്റര് ചെയ്യുന്നതിന് മേളയുടെ മുഖ്യവേദിയായ ടാഗോര് തിയേറ്ററില് ഡെലിഗേറ്റ് സെല് ഒരുക്കിയിട്ടുണ്ട്.
ഏഷ്യന്, ആഫ്രിക്കന്, ലാറ്റിനമേരിക്കന് രാജ്യങ്ങളില്നിന്നുള്ള സിനിമകളുടെ അന്താരാഷ്ട്ര മല്സര വിഭാഗം, മുന്നിര ചലച്ചിത്രമേളകളില് അംഗീകാരങ്ങള് നേടിയ സിനിമകള് ഉള്പ്പെടുന്ന ലോകസിനിമാ വിഭാഗം, ഇന്ത്യന് സിനിമ നൗ, മലയാളം സിനിമ റ്റുഡേ, കണ്ട്രി ഫോക്കസ് വിഭാഗത്തിലുള്ള ചിത്രങ്ങള്, മണ്മറഞ്ഞ ചലച്ചിത്രപ്രതിഭകള്ക്ക് സ്മരണാഞ്ജലിയര്പ്പിക്കുന്ന ഹോമേജ് വിഭാഗം തുടങ്ങിയ പാക്കേജുകള് 30ാമത് ഐ.എഫ്.എഫ്.കെയില് ഉണ്ട്.
സംവിധായകരും സാങ്കേതിക പ്രവര്ത്തകരും ജൂറി അംഗങ്ങളുമുള്പ്പെടെ വിദേശരാജ്യങ്ങളില്നിന്നുള്ള ഇരുനൂറില്പ്പരം അതിഥികള് മേളയില് സംബന്ധിക്കും. മേളയുടെ ഭാഗമായി ഓപ്പണ് ഫോറം, മീറ്റ് ദ ഡയറക്ടര്, ഇന് കോണ്വര്സേഷന്, എക്സിബിഷന്, കലാസാംസ്കാരിക പരിപാടികള് എന്നിവ ഉണ്ടായിരിക്കും.
