ചെന്നൈ:പ്രധാനമന്ത്രി തമിഴ്നാട്ടില് വരുമ്പോഴൊന്നും മോദിയെ കാണാതെ ഒളിച്ചിരിക്കുന്ന മുഖ്യമന്ത്രി സ്റ്റാലിന്, ഇപ്പോള് മെട്രോ പദ്ധതിയുടെ അംഗീകാരത്തിനായി ദല്ഹിയില് പോയി മോദിയെ കാണുമെന്ന് പറയുന്നത് അപമാനകരമാണെന്ന് കെ. അണ്ണാമലൈ.
പ്രധാനമന്ത്രി ഈയിടെ രാമേശ്വരം വന്നിരുന്നു. അന്ന് സ്റ്റാലിന് ഊട്ടിയിലേക്ക് പോവുകയായിരുന്നു. അതിന് ശേഷം പ്രധാനമന്ത്രി മെട്രോ പദ്ധതി നടപ്പാക്കാന് പോകുന്ന കോയമ്പത്തൂരില് വന്നു. അന്നും സ്റ്റാലിന് പ്രധാനമന്ത്രിയെ കാണാന് തയ്യാറായില്ല. അന്ന് ഡിപിആര് (ഡീറ്റെയില്ഡ് പ്രൊജക്ട് റിപ്പോര്ട്ട് – വിശദമായ പദ്ധതി റിപ്പോര്ട്ട്) നല്കിയിരുന്നെങ്കില് ഇതിനകം പദ്ധതി തുടങ്ങിവെയ്ക്കാമായിരുന്നു. – അണ്ണാമലൈ വിമര്ശിച്ചു.
കോയമ്പത്തൂരിലും മധുരൈയിലും മെട്രോ പദ്ധതി നടപ്പാക്കുമെന്നാണ് സ്റ്റാലിന് അവകാശപ്പെടുന്നത്. പക്ഷെ നേരത്തെ നല്കിയ ഡിപിആര് കേന്ദ്രസര്ക്കാര് തള്ളി. നേരത്തെ പ്രധാനമന്ത്രി തമിഴ്നാട്ടില് എത്തിയപ്പോള് ഇക്കാര്യം ചര്ച്ച ചെയ്തിരുന്നെങ്കില് ഇപ്പോള് പദ്ധതി തുടങ്ങാന് കഴിയുമായിരുന്നു. ഇനി ദല്ഹിയില് പോയി സ്റ്റാലിന് എന്താണ് ചര്ച്ച ചെയ്യാന് പോകുന്നത്?- അണ്ണാമലൈ ചോദിച്ചു.
