ഇടുക്കി : കുപ്രസിദ്ധ അന്തര് സംസ്ഥാന മോഷ്ടാവ് ചോളയപ്പന് (45)കുമളി പൊലീസിന്റെ പിടിയിലായി. തമിഴ്നാട് തേനിയിലെ ‘തിരുട്ടു ഗ്രാമം’ എന്നറിയപ്പെടുന്ന കാമാക്ഷിപുരത്ത് നിന്നാണ് സാഹസികമായി പ്രതിയെ പിടികൂടിയത്. 2008-ല് കുമളിയില് നടന്ന മോഷണ പരമ്പരകളിലെ പ്രതിയും കുറുവ സംഘാംഗവുമാണ് ചോളയപ്പന്.
ചക്കുപള്ളം ഭാഗത്ത് വീടിന്റെ പിന്വാതില് കുത്തിതുറന്ന് ഉറങ്ങിക്കിടന്ന സ്ത്രീയുടെ മാല പൊട്ടിക്കുകയും പണം അപഹരിക്കുകയും ചെയ്ത കേസിലാണ് ഇപ്പോള് അറസ്റ്റ് രേഖപ്പെടുത്തിയത്. വീടുകളില് അതിക്രമിച്ചു കയറി ഉറങ്ങിക്കിടക്കുന്നവരുടെ സ്വര്ണവും പണവും ഉള്പ്പെടെയുള്ള സാധനങ്ങള് ഭീഷണിപ്പെടുത്തി കവര്ച്ച ചെയ്യുന്നതാണ് ഇയാളുടെയും സംഘത്തിന്റെയും രീതി.
കുമളിയിലെ സംഭവത്തിന് ശേഷം വിചാരണ നേരിടാതെ ഒളിവില് പോയ ഇയാള്ക്കെതിരെ കേരളത്തിലും തമിഴ്നാട്ടിലുമായി നിരവധി കേസുകളുണ്ട്. മുട്ടം, തൊടുപുഴ, പാലാ, മണിമല, പള്ളിക്കത്തോട് എന്നീ സ്റ്റേഷനുകളില് ഇയാള്ക്കെതിരെ കേസുകളുണ്ട്.
