ജോഹന്നാസ്ബര്ഗ് (ദക്ഷിണാഫ്രിക്ക): ജി 20 ഉച്ചകോടിയില് പങ്കെടുക്കാന് പ്രധാനമന്ത്രി നരേന്ദ്ര മോദി ജോഹന്നാസ്ബര്ഗിലെത്തി. പ്രധാനആഗോള വിഷയങ്ങളില് ലോകനേതാക്കളുമായി ക്രിയാത്മകമായ ചര്ച്ചകള് പ്രതീക്ഷിക്കുന്നതായി പ്രധാനമന്ത്രി എക്സില് കുറിച്ചു. സഹകരണം ശക്തിപ്പെടുത്തുന്നതിലും വികസന മുന്ഗണനകള് മുന്നോട്ട് കൊണ്ടുപോകുന്നതിലും എല്ലാവര്ക്കും മികച്ച ഭാവി ഉറപ്പാക്കുന്നതിലുമായിരിക്കും ശ്രദ്ധയെന്നും അദ്ദേഹം കുറിച്ചു.
ഇന്നും നാളെയുമായി നടക്കുന്ന ഉച്ചകോടിയില് ജി 20 അജണ്ടയെക്കുറിച്ചുള്ള ഭാരതത്തിന്റെ കാഴ്ചപ്പാടുകള് പ്രധാനമന്ത്രി അവതരിപ്പിക്കും. മൂന്ന് സെഷനുകളിലും പ്രധാനമന്ത്രി സംസാരിക്കുമെന്നാണ് പ്രതീക്ഷ. ജോഹന്നാസ്ബര്ഗില് എത്തുന്ന വിവിധ രാഷ്ട്രത്തലവന്മാരുമായും പ്രധാനമന്ത്രി കൂടിക്കാഴ്ചകള് നടത്തും.
ദക്ഷിണാഫ്രിക്ക ആതിഥേയത്വം വഹിക്കുന്ന ഭാരതം- ബ്രസീല് -ദക്ഷിണാഫ്രിക്ക (ഐബിഎസ്എ) നേതാക്കളുടെ യോഗത്തിലും പ്രധാനമന്ത്രി പങ്കെടുക്കും.
