ന്യൂദല്ഹി: ബീഹാറിലെ കനത്ത തിരിച്ചടിക്ക് പിന്നാലെ ഇന്ഡി സഖ്യത്തില് കോണ്ഗ്രസിനെതിരെ പ്രതിഷേധം കനക്കുന്നു. സഖ്യത്തെ നയിക്കാന് കഴിയാത്ത കോണ്ഗ്രസും രാഹുല് ഗാന്ധിയും നേതൃസ്ഥാനത്ത് നിന്ന് മാറണമെന്ന ആവശ്യം ശക്തം.
നേതൃസ്ഥാനത്ത് നിന്ന് കോണ്ഗ്രസ് മാറണമെന്ന ആവശ്യവുമായി സഖ്യത്തിലെ രണ്ടാമനായ സമാജ്വാദി പാര്ട്ടിയാണ് രംഗത്തെത്തിയിരിക്കുന്നത്. എസ്പി നേതാവ് അഖിലേഷ് യാദവിനെ നേതാവാക്കണമെന്നാണ് ആവശ്യം. സഖ്യത്തിന്റെ പ്രതീക്ഷകള് നിറവേറ്റാന് കോണ്ഗ്രസിനാവില്ലെന്നും മുതിര്ന്ന എസ്പി നേതാവും ലക്നൗ സെന്ട്രല് എംഎല്എയുമായ രവിദാസ് മെഹ്റോത്ര പറഞ്ഞു. രാഹുല് ഗാന്ധി, കോണ്ഗ്രസ് പ്രസിഡന്റ് മല്ലികാര്ജുന് ഖാര്ഗെ, പ്രിയങ്ക വാദ്ര തുടങ്ങിയവര് ബീഹാറില് റാലികള് നടത്തിയിട്ടും കോണ്ഗ്രസിനും മഹാസഖ്യത്തിനും യാതൊരു ചലനവും സൃഷ്ടിക്കാനായില്ല. 2020ല് 19 സീറ്റുകള് നേടിയ കോണ്ഗ്രസിന് ഇത്തവണ ആറ് സീറ്റേ നേടാനായുള്ളൂ.
