ഗാസിയാബാദ്: ദൽഹിയിലെ ചെങ്കോട്ടയ്ക്ക് സമീപമുള്ള കാർ ബോംബാക്രമണത്തിൽ അതിയായ രോഷം പ്രകടിപ്പിച്ച് ജുന അഖാരയിലെ മഹാമണ്ഡലേശ്വർ യതി നരസിംഹാനന്ദ് ഗിരി. ഉത്തർപ്രദേശിലെ ഗാസിയാബാദിലെ ദാസ്നയിലുള്ള ശിവശക്തി ധാമിലെ മഹന്ത് യതി നരസിംഹാനന്ദ് ഗിരി, അൽ ഫലാഹ് സർവകലാശാല, അലിഗഡ് മുസ്ലീം സർവകലാശാല, ജാമിയ മില്ലിയ ഇസ്ലാമിയ സർവകലാശാല, ദാറുൽ ഉലൂം ദിയോബന്ദ് സർവകലാശാല എന്നിവ തകർക്കണമെന്ന് ആഹ്വാനം ചെയ്യുന്ന ഒരു വീഡിയോ തന്നെ പുറത്തിറക്കി. സ്ഫോടനവുമായി ബന്ധപ്പെട്ട് രാജ്യത്തെ സുരക്ഷാ ഏജൻസികൾ സംശയിക്കുന്ന സ്ഥലങ്ങളിൽ റെയ്ഡ് നടത്തുന്ന സമയത്താണ് നരസിംഹാനന്ദിന്റെ പ്രസ്താവന.
നവംബർ 10 ന് ദൽഹിയിലെ ചെങ്കോട്ട മെട്രോ സ്റ്റേഷന്റെ ഒന്നാം നമ്പർ ഗേറ്റിലാണ് ഒരു വാഹനം പൊട്ടിത്തെറിച്ചത്. ഇതുവരെ ഈ സ്ഫോടനത്തിൽ 12 പേർ കൊല്ലപ്പെട്ടതായും 20 ലധികം പേർക്ക് പരിക്കേറ്റതായും റിപ്പോർട്ടുണ്ട്. സംഭവം രാജ്യവ്യാപകമായി പ്രതിഷേധത്തിന് കാരണമായിട്ടുണ്ട്. ഉത്തരവാദികൾക്കെതിരെ കർശന നടപടി സ്വീകരിക്കണമെന്ന് സന്യാസിമാരും ഹിന്ദു സംഘടനകളും ആവശ്യപ്പെട്ടു.
അതേസമയം നരസിംഹാനന്ദ് ഗിരി തന്റെ പ്രസ്താവനയിൽ പീരങ്കി വെടിവയ്പ്പ് നടത്തി പ്രമുഖ മുസ്ലീം സ്ഥാപനങ്ങൾ നശിപ്പിക്കാൻ സൈന്യത്തോട് ആഹ്വാനം ചെയ്തിട്ടുണ്ട്. ഈ നടപടി സ്വീകരിക്കുന്നതുവരെ രാജ്യം സുരക്ഷിതമായിരിക്കില്ലെന്ന് അദ്ദേഹം പറഞ്ഞു.
സ്ഫോടനത്തെത്തുടർന്ന് ഉത്തർപ്രദേശ് മുഴുവൻ അതീവ ജാഗ്രതയിലാണ്, സുരക്ഷാ ഉദ്യോഗസ്ഥർ സംശയാസ്പദമായ വാഹനങ്ങൾ സൂക്ഷ്മമായി പരിശോധിക്കുന്നുണ്ട്. ആഗ്ര, ലഖ്നൗ, വാരണാസി, സഹാറൻപൂർ, മീററ്റ്, അയോധ്യ എന്നിവിടങ്ങളിൽ രഹസ്യാന്വേഷണ ഏജൻസികൾ ജാഗ്രതയിലാണ്. കുറ്റവാളികളെ ഒരു കാരണവശാലും വെറുതെ വിടില്ലെന്ന് സംഭവത്തെക്കുറിച്ച് കേന്ദ്ര ആഭ്യന്തര മന്ത്രി അമിത് ഷാ വ്യക്തമായി പറഞ്ഞിട്ടുണ്ട്.
