തിരുവനന്തപുരം: വര്ക്കലയില് ട്രെയിനില് നിന്നും പെണ്കുട്ടിയെ തള്ളിയിട്ട സംഭവത്തില് പ്രതിയെ കീഴ്പ്പെടുത്തിയയാളെക്കുറിച്ചുള്ള വിവരങ്ങള് തേടി റെയില്വേ പോലീസ്. പ്രതിയെ കീഴ്പ്പെടുത്തുന്ന ആളുടെ സിസിടിവി ദൃശ്യങ്ങള് പുറത്തുവിട്ടാണ് ഇയാള്ക്കായുള്ള അന്വേഷണം ആരംഭിച്ചത്. ഇയാളെക്കുറിച്ച് വിവരം ലഭിക്കുന്നവര് 9846200100 എന്ന നമ്പരില് അറിയിക്കണമെന്നും റെയില്വേ പോലീസ് അഭ്യര്ത്ഥിച്ചു.
സംഭവം നടന്ന ബോഗിയിലെ സിസിടിവി ദൃശ്യങ്ങളിലാണ് രക്ഷകനായെത്തിയ ആളുടെ ദൃശ്യങ്ങള് പതിഞ്ഞിരിക്കുന്നത്. പ്രതിയായ സുരേഷ് രണ്ടാമത്തെ പെണ്കുട്ടിയെ അക്രമിക്കാനൊരുങ്ങുമ്പോള് ചുവപ്പു വസ്ത്രം ധരിച്ചയാള് ഓടിയെത്തി ജീവന് പണയപ്പെടുത്തി ഒറ്റക്കൈ കൊണ്ട് ട്രെയിനിലേക്ക് പെണ്കുട്ടിയെ തിരികെക്കയറ്റുകയും അക്രമിയെ കീഴ്പ്പെടുത്തുന്ന ദൃശ്യങ്ങളാണ് സിസിടിവിയിലുള്ളത്. പെണ്കുട്ടിയെ രക്ഷിച്ച ഇയാളെ കണ്ടെത്താനുള്ള ശ്രമത്തിലാണ് റെയില്വേ പോലീസ്. ഇതുവരെ ഇയാളെ കണ്ടെത്താനായിട്ടില്ല.
അതിനിടെ പെണ്കുട്ടിയെ ചവിട്ടിത്തള്ളിയിട്ട സംഭവത്തിലെ പ്രതി പനച്ചമൂട് വടക്കുംകര വീട്ടില് സുരേഷ്കുമാറിനെ (50) സാക്ഷികള്ക്കു മുന്നിലെത്തിച്ച് തിരിച്ചറിയല് പരേഡ് നടത്താനൊരുങ്ങുകയാണ് അന്വേഷണസംഘം. ജയിലില് വെച്ചാകും തിരിച്ചറിയല് പരേഡ്. ഇതിനുശേഷം മാത്രമേ പ്രതിയെ കസ്റ്റഡിയില് വാങ്ങാന് അപേക്ഷ നല്കൂവെന്ന് പോലീസ് അറിയിച്ചു. ശ്രീക്കുട്ടിക്ക് ഒപ്പമുണ്ടായിരുന്ന സുഹൃത്ത് അര്ച്ചന പ്രതിയെ നേരത്തേ തന്നെ തിരിച്ചറിഞ്ഞിരുന്നു.
തീവണ്ടിയില് നിന്നു തെറിച്ചുവീണ് പരിക്കേറ്റ് ഗുരുതരാവസ്ഥയില് കഴിയുന്ന പാലോട് സ്വദേശിയായ ശ്രീക്കുട്ടിയും സുഹൃത്ത് അര്ച്ചനയും തീവണ്ടിക്കുള്ളില് സുരേഷ്കുമാറുമായി തര്ക്കിക്കുന്നതായാണ് ക്യാമറാദൃശ്യം. ഇയാള് തീവണ്ടിക്കുള്ളില് പുകവലിച്ചത് പെണ്കുട്ടികള് ചോദ്യംചെയ്തതാണ് തര്ക്കത്തിനും ആക്രമണത്തിനും കാരണമെന്നാണ് പോലീസ് പറയുന്നത്. ഗുരുതരമായി പരിക്കേറ്റ ശ്രീക്കുട്ടി ഇതുവരെ അപകടനില തരണം ചെയ്തിട്ടില്ല.
