കൊച്ചി: കാറോടിച്ച് നിരവധി അപകടങ്ങളുണ്ടാക്കിയ 16കാരനെതിരെ കടുത്ത നടപടിയുമായി മോട്ടോര് വാഹന വകുപ്പ്. കുട്ടിക്ക് 25 വയസ് തികയാതെ ഇനി ലൈസന്സ് എടുക്കാനാകില്ല. വാഹനത്തിന്റെ രജിസ്ട്രേഷന് ഒരു വര്ഷത്തേയ്ക്ക് റദ്ദാക്കും. കാറിടിച്ച് പരിക്കേറ്റ വയോധികയുടെ ചികിത്സാച്ചെലവുകള് കുട്ടിയുടെ പിതാവും വാഹന ഉടമയുമായ അബ്ദുള് റഷീദ് വഹിക്കണം. മറ്റ് വാഹനങ്ങള്ക്കുണ്ടായ നഷ്ടവും നല്കണം. പ്രായപൂര്ത്തിയാകാത്ത കുട്ടിക്ക് കാര് ഓടിക്കാന് നല്കിയതി പിതാവിനെ പ്രതിയാക്കി പൊലീസ് കേസെടുത്തിട്ടുണ്ട്.
സഹപാഠികള്ക്കൊപ്പം ചെറായി ബീച്ചില് പോയി മടങ്ങുമ്പോഴാണ് അപകടങ്ങളുണ്ടായത്. ഇന്നോവ ക്രിസ്റ്റ കാര് താനറിയാതെ കുട്ടി എടുത്തുകൊണ്ടു പോയതെന്നാണ് പിതാവ് പറയുന്നത്.
വൈപ്പിന്-മുനമ്പം സംസ്ഥാന പാതയിലും കണ്ടെയ്നര് റോഡിലുമാണ് ഇന്നലെ രാവിലെ വാഹനാപകട പരമ്പര ഉണ്ടായത്. എറണാകുളത്ത് സൂപ്പര്മാര്ക്കറ്റ് നടത്തുന്ന കലൂര് സ്വദേശി അബ്ദുള് റഷീദിന്റെ പത്താംക്ലാസുകാരനായ മകനാണ് കാറുമായി ഇറങ്ങി അപകടങ്ങളുണ്ടാക്കിയത്.
്
