ന്യൂദല്ഹി: മുഖ്യമന്ത്രി പദത്തിനായി ഇപ്പൊഴേ കുപ്പായം തുന്നിവയ്ക്കേണ്ടെന്ന് കേരളത്തിലെ ചില കോണ്ഗ്രസ് നേതാക്കളെ ഓര്മ്മിപ്പിച്ച് രാഹുല് ഗാന്ധി. ഗ്രൂപ്പുപോര് അവസാനിപ്പിച്ച് ആദ്യം ജയിക്കാനുള്ള വഴി നോക്കണമെന്നും അദ്ദേഹം ആവശ്യപ്പെട്ടു. അടുത്തകാലത്തായി മുഖ്യമന്ത്രി സ്ഥാനാര്ത്ഥിയെ കോണ്ഗ്രസ് മുന്കൂര് പ്രഖ്യാപിക്കാറില്ലെന്ന് രാഹുല് ഗാന്ധി പറഞ്ഞു. നേതാക്കള് കൂട്ടായ പ്രവര്ത്തനം നടത്തണം, എല്ലാ നേതാക്കളും പാര്ട്ടി യോഗങ്ങളില് പങ്കെടുക്കുന്നത് ഉറപ്പാക്കണം.
നിയമസഭ തെരഞ്ഞെടുപ്പ് പ്രവര്ത്തനങ്ങള്ക്കുമുന്നോടിയായി കോണ്ഗ്രസില് 17 അംഗ കോര് കമ്മിറ്റിയെയും ഹൈക്കമാന്ഡ് പ്രഖ്യാപിച്ചിട്ടുണ്ട്. കേരളത്തിന്റെ ചുമതലയുള്ള എഐസിസി ജനറല് സെക്രട്ടറി ദീപാ ദാസ് മുന്ഷി കണ്വീനറായ കോര് കമ്മിറ്റിയില് മുതിര്ന്ന നേതാവ് എ കെ ആന്റണിയുമുണ്ട്. കഴിയുന്നത്ര എല്ലാഗ്രൂപ്പിലുള്ളവരെയും തൃപ്തിപ്പെടുത്തുംവിധമാണ് കമ്മിറ്റി രൂപീകരിച്ചിരിക്കുന്നത്.
കെപിസിസി പ്രസിഡന്റ് സണ്ണി ജോസഫ്, പ്രതിപക്ഷ നേതാവ് വിഡി സതീശന്, കെ സി വേണുഗോപാല്, മുന് കെപിസിസി അധ്യക്ഷന്മാരായ കെ സുധാകരന്, കെ മുരളീധരന്, എംഎം ഹസന്, വി എം സുധീരന്, മുല്ലപ്പള്ളി രാമചന്ദ്രന്, രമേശ് ചെന്നിത്തല, ശശി തരൂര് എംപി, ഷാനിമോള് ഉസ്മാന്, കൊടിക്കുന്നില് സുരേഷ്, കെപിസിസി വര്ക്കിങ് പ്രസിഡന്റുമാരായ എപി അനില്കുമാര്, പി സി വിഷ്ണുനാഥ്, ഷാഫി പറമ്പില് എന്നിവരാണ് കോര് കമ്മിറ്റിയിലുള്ളത്.
