തിരുവനന്തപുരം: തദ്ദേശ, നിയമസഭാ തിരഞ്ഞെടുപ്പുകള് അടുത്ത് വരവെ വമ്പന് പ്രഖ്യാപനങ്ങളുമായി സര്ക്കാര്.തെരഞ്ഞെടുപ്പ് പ്രചാരണം നേരത്തേ തുടങ്ങിയ മട്ടിലാണ് മുഖ്യമന്ത്രി വാര്ത്താ സമ്മേളനത്തില് പ്രഖ്യാപനങ്ങള് നടത്തിയത്.
സാമൂഹ്യക്ഷേമ പെന്ഷന് 1600 രൂപയില്നിന്ന് 2000 രൂപയായി വര്ധിപ്പിച്ചു. ആശാവര്ക്കര്മാരുടെ പ്രതിമാസ ഓണറേറിയം ആയിരം രൂപ വര്ധിപ്പിക്കുമെന്നും മുഖ്യമന്ത്രി അറിയിച്ചു. ഇതുവരെയുള്ള കുടിശിക നല്കും.
സംസ്ഥാന സര്ക്കാര് ജീവനക്കാര്, പെന്ഷന്കാര് എന്നിവര്ക്കു നല്കാനുള്ള ഒരു ഗഡു ഡിഎ കുടിശിക 4% നവംബറിലെ ശമ്പളത്തിനൊപ്പം നല്കുമെന്നും മുഖ്യമന്ത്രി പറഞ്ഞു.
സ്ത്രീകള്ക്കായി പ്രത്യേക പെന്ഷനും മുഖ്യമന്ത്രി പ്രഖ്യാപിച്ചു, സ്ത്രീസുരക്ഷാ പെന്ഷന് പദ്ധതിയാണ് അവതരിപ്പിച്ചത്. ഇതിനായി 3800 കോടി രൂപയായിരിക്കും സര്ക്കാര് ചെലവിടുക. നിലവില് ഒരു സാമൂഹ്യസുരക്ഷാ പെന്ഷന് പദ്ധതിയുടേയും കീഴില് വരാത്ത 35 മുതല് 60 വയസുവരെ പ്രായമുള്ള പാവപ്പെട്ട കുടുംബങ്ങളിലെ സ്ത്രീകള്ക്ക് 1000 രൂപ പെന്ഷന് നല്കുന്നതാണ് പദ്ധതി.33 ലക്ഷത്തിലേറെ സ്ത്രീകള്ക്കു സഹായം കിട്ടും. യുവാക്കള്ക്ക് സ്കോളര്ഷിപ്പ് പദ്ധതിയും പ്രഖ്യാപിച്ചു. പ്രതിവര്ഷ കുടുംബവരുമാനം ഒരു ലക്ഷം രൂപയ്ക്കു താഴെയുള്ള വിദ്യാര്ഥികള്ക്ക് പ്രതിമാസം ആയിരം രൂപ വീതം നല്കുമെന്ന് മുഖ്യമന്ത്രി പറഞ്ഞു.
സാക്ഷരതാ പ്രേരക്മാരുടെ പ്രതിമാസ ഓണറേറിയം ആയിരം രൂപയായി കൂട്ടും. ഇതുവരെയുള്ള കുടിശിക നല്കും. പ്രീപ്രൈമറി ടീച്ചര്മാരുടെയും ആയമാരുടെയും പ്രതിമാസ വേതനം ആയിരം രൂപ കൂട്ടി. ഗസ്റ്റ് ലക്ചര്മാരുടെ പ്രതിമാസ വേതനം പരമാവധി 2000 രൂപ വരെ കൂട്ടുമെന്ന് മുഖ്യമന്ത്രി അറിയിച്ചു.
റബര് കര്ഷകര്ക്കുളള റബറിന്റെ താങ്ങുവില കിലോയ്ക്ക് 180 രൂപയില്നിന്ന് 200 രൂപയാക്കി വര്ദ്ധിപ്പിക്കും. നവംബര് ഒന്ന് മുതല് പ്രാബല്യത്തില് വരും. നെല്ലിന്റെ സംഭരണ വില 28.20ല്നിന്ന് 30 രൂപയായി വര്ധിപ്പിക്കുമെന്നും മുഖ്യമന്ത്രി പ്രഖ്യാപിച്ചു.
