തിരുവനന്തപുരം: ഈ അദ്ധ്യയന വർഷത്തെ എസ്എസ്എൽസി (SSLC), ഹയർ സെക്കന്ററി (Plus Two) പരീക്ഷകളുടെ തീയതികൾ പ്രഖ്യാപിച്ച് വിദ്യാഭ്യാസ മന്ത്രി വി ശിവൻകുട്ടി. 2026 മാർച്ച് അഞ്ചിനാണ് എസ്എസ്എൽസി പരീക്ഷ ആരംഭിക്കുന്നത്. മാർച്ച് 30ന് അവസാനിക്കും. 2026 മേയ് എട്ടിനാണ് ഫലപ്രഖ്യാപനം. സംസ്ഥാനത്തൊട്ടാകെ 3000 പരീക്ഷാ കേന്ദ്രങ്ങളിലാണ് എസ്എസ്എൽസി പരീക്ഷ നടത്താൻ തീരുമാനിച്ചിരിക്കുന്നത്.
പരീക്ഷകൾ സുഗമമായി നടത്തുന്നതിനുള്ള എല്ലാ മുന്നൊരുക്കങ്ങളും ആരംഭിക്കാൻ പൊതുവിദ്യാഭ്യാസ വകുപ്പിന് നിർദേശം നൽകിയിട്ടുണ്ടെന്ന് മന്ത്രി അറിയിച്ചു. രാവിലെ 9.30നാണ് പരീക്ഷ ആരംഭിക്കുന്നത്. ജനുവരി 12 മുതൽ 22 വരെയാണ് ഐടി മോഡൽ പരീക്ഷ നടത്തുക. ഫെബ്രുവരി രണ്ട് മുതൽ 12 വരെയാണ് ഐടി പരീക്ഷ. ഫെബ്രുവരി 16 മുതൽ 20വരെയാണ് മോഡൽ പരീക്ഷ.
2025 നവംബർ 12 മുതൽ 19 വരെയാണ് പരീക്ഷാ ഫീസ് അടയ്ക്കേണ്ടത്. നവംബർ 21 മുതൽ 26 വരെ പിഴയോടുകൂടി അപേക്ഷകൾ സ്വീകരിക്കും. 2026 ഏപ്രിൽ ഏഴ് മുതൽ 25 വരെയായിരിക്കും മൂല്യനിർണയം. ഗൾഫ് മേഖലയിൽ ഏഴും ലക്ഷദ്വീപിൽ ഒമ്പതും പരീക്ഷാ കേന്ദ്രങ്ങളുണ്ട്. 4,25,000 കുട്ടികളാണ് എസ്എസ്എൽസി പരീക്ഷ എഴുതുന്നത്.
ഹയർസെക്കൻഡറി, വൊക്കേഷണൽ ഹയർസെക്കൻഡറി ഒന്നാം വർഷ പൊതുപരീക്ഷകൾ 2026 മാർച്ച് അഞ്ച് മുതൽ മാർച്ച് 27 വരെ നടക്കും. രണ്ടാം വർഷ പൊതുപരീക്ഷകൾ മാർച്ച് ആറ് മുതൽ 28 വരെ നടക്കും. ഒന്നാം വർഷ പരീക്ഷ ഉച്ചയ്ക്ക് 1.30നും രണ്ടാം വർഷ പരീക്ഷകൾ രാവിലെ 9.30നും ആരംഭിക്കും. വെള്ളിയാഴ്ച രാവിലെ 9.15ന് ആരംഭിച്ച് ഉച്ചയ്ക്ക് 12 മണിക്ക് അവസാനിക്കും.
വിശദമായ ടൈംടേബിൾ ഉടൻതന്നെ ഔദ്യോഗിക വെബ്സൈറ്റിൽ പ്രസിദ്ധീകരിക്കും. വിദ്യാർത്ഥികൾക്ക് പഠനത്തിനായുള്ള സമയക്രമം ആസൂത്രണം ചെയ്യുന്നതിന് ഈ തീയതികൾ സഹായകമാകും.
