ചെന്നൈ: പ്രദീപ് രംഗനാഥന്- മമിത ബൈജു ചിത്രമായ ‘ഡ്യൂഡി’ല് തന്റെ രണ്ട് ഗാനങ്ങള് അനുമതിയില്ലാതെ ഉപയോഗിച്ചതില് നിയമനടപടി തുടരാന് സംഗീതസംവിധായകന് ഇളയരാജയ്ക്ക് മദ്രാസ് ഹൈക്കോടതി അനുമതി നല്കി.
പകര്പ്പവകാശം സംബന്ധിച്ച കേസ് സുപ്രീം കോടതിയില് നിലനില്ക്കുന്നതിനാല് അടുത്ത മാസം 19 ന് വാദം കേള്ക്കല് തുടരും.
സോണി മ്യൂസിക് , എക്കോ റെക്കോര്ഡിംഗ് കമ്പനി, ഓറിയന്റല് റെക്കോര്ഡ്സ് എന്നിവയ്ക്കെതിരെയുള്ള പകര്പ്പവകാശ കേസ് ഇതോടെ മുറുകി.
ഇളയരാജയെ പ്രതിനിധീകരിച്ച് ഹാജരായ മുതിര്ന്ന അഭിഭാഷകന് എസ്. പ്രഭാകരന്, സോണി ഇതുവരെ മറുപടി ഫയല് ചെയ്തിട്ടില്ലെന്നും ‘ഡ്യൂഡ്’ എന്ന സിനിമയില് അദ്ദേഹത്തിന്റെ ഗാനങ്ങള് അനുമതിയില്ലാതെ ഉപയോഗിക്കുന്നുണ്ടെന്നും ജഡ്ജി എന്. സെന്തില്കുമാര് മുമ്പാകെ ബോധിപ്പിച്ചു.
ഇളയരാജയുടെ കൃതികളുടെ വാണിജ്യ ഉപയോഗത്തില് നിന്നുള്ള വരുമാനത്തിന്റെ വിശദാംശങ്ങള് സമര്പ്പിക്കാന് മദ്രാസ് ഹൈക്കോടതി സോണിയോട് നേരത്തെ ഉത്തരവിട്ടിരുന്നു.
