ന്യൂദൽഹി : ദീപാവലിയ്ക്ക് ഇന്ത്യൻ ഉൽപ്പന്നങ്ങൾ പ്രോത്സാഹിപ്പിക്കാൻ രാജ്യത്തെ ജനങ്ങളോട് ആവശ്യപ്പെട്ട് പ്രധാനമന്ത്രി നരേന്ദ്രമോദി. വസ്ത്രങ്ങൾ, ഷൂസ്, മറ്റ് വസ്തുക്കൾ എന്നിവയുൾപ്പെടെ ഇന്ത്യൻ ഉൽപ്പന്നങ്ങൾ വിൽക്കുന്ന കടകൾ ഉൾക്കൊള്ളുന്ന ഒരു പരസ്യത്തിന്റെ വീഡിയോ പങ്കിട്ടുകൊണ്ടാണ് പ്രധാനമന്ത്രി ഈ ആവശ്യം ഉന്നയിച്ചത്.
“140 കോടി ഇന്ത്യക്കാരുടെ കഠിനാധ്വാനം, സർഗ്ഗാത്മകത, നവീകരണം എന്നിവ ആഘോഷിച്ചുകൊണ്ട് നമുക്ക് ഈ ഉത്സവകാലം ആഘോഷിക്കാം.” – പോസ്റ്റ് പങ്കിട്ട അദ്ദേഹം എക്സിൽ എഴുതി. ഇതു കൂടാതെ ഉത്സവകാലത്ത് വാങ്ങിയ ഇന്ത്യൻ ഉത്പനങ്ങൾ സോഷ്യൽ മീഡിയയിൽ പങ്കിടാനും അദ്ദേഹം അഭ്യർത്ഥിച്ചു.
“നിങ്ങൾ വാങ്ങിയത് സോഷ്യൽ മീഡിയയിൽ പങ്കിടുക. അങ്ങനെ മറ്റുള്ളവരെയും ഇത് ചെയ്യാൻ പ്രചോദിപ്പിക്കും,” – പ്രധാനമന്ത്രി പറഞ്ഞു. കൂടാതെ നമുക്ക് ഇന്ത്യൻ ഉൽപ്പന്നങ്ങൾ വാങ്ങി, “ഗർവ് സേ കഹോ യേ സ്വദേശി ഹേ!” എന്ന് പറയാം. സോഷ്യൽ മീഡിയയിൽ നിങ്ങൾ വാങ്ങിയതും പങ്കിടുക. ഈ രീതിയിൽ, മറ്റുള്ളവരെയും ഇത് ചെയ്യാൻ പ്രചോദിപ്പിക്കുമെന്നും അദ്ദേഹം വ്യക്തമാക്കി.
വീഡിയോയുടെ ആദ്യ ഭാഗത്തിൽ ബോളിവുഡ് താരങ്ങളായ മാധുരി ദീക്ഷിത്, വരുൺ ധവാൻ തുടങ്ങിയ സെലിബ്രിറ്റികൾ ഉൾപ്പെടുന്നുണ്ട്. വീഡിയോയുടെ രണ്ടാം ഭാഗത്തിൽ പ്രധാനമന്ത്രി മോദി അരുണാചൽ പ്രദേശിലെ പ്രാദേശിക വ്യാപാരികളുമായി സംവദിക്കുന്നതിന്റെ ഒരു ഭാഗമായിരുന്നു ഉൾപ്പെടുത്തിയിരുന്നത്.
അതേ സമയം സ്വാശ്രയത്വം നേടേണ്ടതിന്റെ ആവശ്യകത പ്രധാനമന്ത്രി മോദി നിരവധി തവണ ആവർത്തിച്ചിട്ടുണ്ട്. അടുത്തിടെ നവരാത്രിയുടെ തലേന്ന് രാജ്യത്തെ അഭിസംബോധന ചെയ്യുന്നതിനിടെ സ്വദേശി ഉൽപ്പന്നങ്ങൾ വാങ്ങുന്നതിലും വിൽക്കുന്നതിലും അഭിമാനിക്കണമെന്ന് പ്രധാനമന്ത്രി ജനങ്ങളോട് പറഞ്ഞിരുന്നു.
കൂടാതെ വികസിത ഇന്ത്യ എന്ന ലക്ഷ്യം കൈവരിക്കുന്നതിന്, നമ്മൾ സ്വാശ്രയത്വത്തിന്റെ പാതയിലൂടെ സഞ്ചരിക്കണം, ഇന്ത്യയെ സ്വാശ്രയമാക്കുന്നതിൽ നമ്മുടെ എംഎസ്എംഇകൾക്ക് ഒരു പ്രധാന ഉത്തരവാദിത്തമുണ്ടെന്നും അദ്ദേഹം പറഞ്ഞിരുന്നു.
