ന്യൂദല്ഹി: യെമനില് വധശിക്ഷയ്ക്ക് വിധിക്കപ്പെട്ട പാലക്കാട് സ്വദേശിനി നിമിഷപ്രിയയുടെ മോചനത്തിനായി പുതിയ മധ്യസ്ഥന് ചര്ച്ചകള് നടത്തുന്നതായി കേന്ദ്ര സര്ക്കാര് സുപ്രീം കോടതിയെ അറിയിച്ചു. നിലവില് ആശങ്കപ്പെടേണ്ട സാഹചര്യം ഇല്ലെന്നും അദ്ദേഹം പറഞ്ഞു. എന്നാല് പുതിയ മധ്യസ്ഥന് ആരാണെന്ന കാര്യം അദ്ദേഹം കോടതിയില് വ്യക്തമാക്കിയില്ല.
നിമിഷപ്രിയ ആക്ഷന് കൗണ്സില് ഫയല് ചെയ്ത ഹര്ജി പരിഗണിക്കവെയാണ് അറ്റോര്ണി ജനറല് ആര്. വെങ്കിട്ടരമണി പുതിയ മധ്യസ്ഥനെ നിയോഗിച്ച കാര്യം സുപ്രീംകോടതിയെ അറിയിച്ചത്. ഈ മധ്യസ്ഥന് സുപ്രീംകോടതിയില് ഹര്ജി ഫയല് ചെയ്ത വ്യക്തിയാണോ എന്ന് കോടതി ആരാഞ്ഞപ്പോള് അല്ലെന്ന് അറ്റോര്ണി ജനറല് മറുപടി നല്കി. ഗ്ലോബല് പീസ് ഇനിഷ്യേറ്റീവ് സ്ഥാപകന് കെ.എ. പോള് ആയിരുന്നു സുപ്രീംകോടതിയില് നേരത്തെ ഹര്ജി ഫയല് ചെയ്തിരുന്നത്.
കേസില് മധ്യസ്ഥശ്രമങ്ങള് നടക്കുകയാണെന്ന് നിമിഷപ്രിയ ആക്ഷന് കൗണ്സില് കോടതിയെ അറിയിച്ചു.കേസ് പരിഗണിക്കുന്നത് നീട്ടിവെക്കണമെന്നും കോടതിയോട് അഭ്യര്ത്ഥിച്ചു.
തുടര്ന്ന് ഹര്ജി ജനുവരിയില് പരിഗണിക്കാനായി ജസ്റ്റിസ് വിക്രംനാഥ്, ജസ്റ്റിസ് സന്ദീപ് മേത്ത എന്നിവരടങ്ങിയ ബെഞ്ച് മാറ്റി.
അടിയന്തിര സാഹചര്യം ഉണ്ടായാല് നിമിഷപ്രിയ ആക്ഷന് കൗണ് സിലിന് കോടതിയെ സമീപിക്കാമെന്നും ബെഞ്ച് വ്യക്തമാക്കി.
