പത്തനംതിട്ട: സ്വര്ണക്കൊള്ളയില് സ്വര്ണം പൂശല് നടത്തിയ സ്മാര്ട് ക്രിയേഷന്സും ഹൈദരാബാദ് സ്വദേശിയായ ചെമ്പ് പണിക്കാരന് നാഗേഷും അയാളുടെ സുഹൃത്തായ കല്പ്പേഷും പ്രതികളായേക്കും. മൊഴിമാറ്റം നടത്തിയ സ്മാര്ട് ക്രിയേഷന്സ് സിഇഒ പങ്കജ് ഭണ്ഡാരിയെ എസ്ഐടി ചോദ്യം ചെയ്തെന്നാണ് അറിവ്.
2019 ജൂലൈ 20ന് ശബരിമല ശ്രീകോവിലിലെ ദ്വാരപാലക ശില്പങ്ങളില് നിന്നും ഇളക്കിയ സ്വര്ണപ്പാളികള് അനന്ത സുബ്രഹ്മണ്യം എന്ന ആളിന്റെ കൈയിലാണ് ചെന്നൈയ്ക്ക് കൊടുത്തയച്ചത്. എന്നാല് ഇയാള് പോയത് ബെംഗളൂരുവിലേക്കാണ്. അതിനുശേഷമാണ് ഹൈദരാബാദില് എത്തി സ്വര്ണപ്പാളികള് നാഗേഷ് എന്ന ചെമ്പ് പണിക്കാരനെ ഏല്പ്പിച്ചത്. പാളികളില് നിന്നും നാഗേഷ് വേര്പെടുത്തിയ സ്വര്ണം കല്പ്പേഷ് എന്ന ആളിന് കൈമാറി. പിന്നീട് നാഗേഷ് പുതിയ ചെമ്പുപാളികളില് ദ്വാരപാലക ശില്പഭാഗങ്ങള് നിര്മിച്ച് ഉണ്ണികൃഷ്ണന് പോറ്റിക്ക് കൈമാറി. ഒടുവില്, ആഗസ്ത് 29നാണ് പുതിയ പാളികള് പോറ്റി സ്മാര്ട് ക്രിയേഷന്സില് എത്തിച്ചത്.
സന്നിധാനത്തു നിന്നും തിരിച്ച് ചെന്നൈ വരെയുള്ള റൂട്ട് മാപ്പ് എടുത്താല് ഇതില് ദേവസ്വം ബോര്ഡിന് പുറത്തുള്ള അഞ്ച് വ്യക്തികളുടെ പങ്കു കാണാം. ഉണ്ണികൃഷ്ണന് പോറ്റി, അനന്ത സുബ്രഹ്മണ്യം, നാഗേഷ്, കല്പ്പേഷ്, സമാര്ട്ട് ക്രിയേഷന് സിഇഒ പങ്കജ് ദണ്ഡാരി എന്നിവരാണവര്. ഇവരെ ചോദ്യം ചെയ്താല് മാത്രമെ സ്വര്ണം പോയ വഴികള് കൃത്യമായി അറിയാനാവു. അതിനാല് ഈ റൂട്ട് മാപ്പ് തയാറാക്കി ഉണ്ണികൃഷ്ണന് പോറ്റിയുമായി 2019 ജൂലൈ 20 മുതല് ഓഗസ്റ്റ് 29 വരെയുള്ള പ്രയാണ വഴികളിലൂടെ തെളിവെടുപ്പു നടത്തുമെന്നാണ് സൂചന.
