തിരുവനന്തപുരം: കാന്സര് രോഗികള്ക്ക് കേരളത്തിലെവിടെയും ചികിത്സാ ആവശ്യങ്ങള്ക്കായി സൂപ്പര്ഫാസ്റ്റ് മുതല് താഴോട്ടുള്ള എല്ലാ ബസുകളിലും സൗജന്യ യാത്രയെന്ന പ്രഖ്യാപനവുമായി സഭയില് മന്ത്രി കെ.ബി. ഗണേഷ് കുമാര്.
റേഡിയേഷന്, കീമോ തുടങ്ങിയ എന്ത് ആവശ്യത്തിനു പോകുന്ന രോഗികള്ക്കും പദ്ധതി ഉപയോഗപ്പെടുത്താം. സ്വകാര്യ ആശുപത്രികളിലുള്ള രോഗികള്ക്കും പദ്ധതി സഹായകരമാണെന്ന് മന്ത്രി പറഞ്ഞു. ചികിത്സിക്കുന്ന ഡോക്ടര് സര്ട്ടിഫൈ ചെയ്താല് ഇതിനുള്ള പാസ് അനുവദിക്കും. നേരത്തെ ഫാസ്റ്റ് പാസഞ്ചര് ബസുകളില് ഈ സൗകര്യം ലഭിച്ചിരുന്നു.
2012ല് സിറ്റി ബസ്, ഓര്ഡിനറി ബസുകള്ക്ക് 50 ശതമാനമെന്ന ഓര്ഡര് ഇറക്കിയതിനാല് ഈ പ്രഖ്യാപനത്തിന്റെ ക്രെഡിറ്റ് ഏറ്റെടുക്കാന് യുഡിഎഫ് വരരുതെന്ന് മന്ത്രി പരിഹസിച്ചു. ഇത് സംസ്ഥാനത്തിന് ബാധകമായ പ്രഖ്യാപനമാണ്. ഓര്ഡിനറി മാത്രമല്ല, സൂപ്പര്ഫാസ്റ്റ് മുതല് താഴേക്ക് ഏത് ബസിലും സമ്പൂര്ണ സൗജന്യമാണ് ഇതിന്റെ പ്രത്യേകത എന്ന് മനസിലാക്കണമെന്നും മന്ത്രി കൂട്ടിച്ചേര്ത്തു.
