തിരുവനന്തപുരം: മൂന്നിലൊന്ന് അംഗങ്ങള് രേഖാമൂലമാവശ്യപ്പെട്ടാല് ഏഴു ദിവസത്തിനകം സിന്ഡിക്കേറ്റ് യോഗം വിളിച്ച് ചേര്ക്കുന്നതിന് വൈസ്ചാന്സലറെ ചുമതലപ്പെടുത്തുന്ന വ്യവസ്ഥ ഉള്പ്പെടുത്തുന്ന സര്വ്വകലാശാലാ നിയമങ്ങള് (ഭേദഗതി) ബില് ഉന്നതവിദ്യാഭ്യാസ മന്ത്രി ഡോ. ആര് ബിന്ദു നിയമസഭയില് അവതരിപ്പിച്ചു.
സിന്ഡിക്കേറ്റുകള് കാര്യക്ഷമമായി പ്രവര്ത്തിക്കേണ്ടത് സര്വ്വകലാശാലകള്ക്കും വിദ്യാര്ത്ഥികള്ക്കും അത്യന്താപേക്ഷിതമാണെന്നും അതുറപ്പാക്കാനാണ് ഭേദഗതി ബില്ലുകളെന്നും മന്ത്രി അവകാശപ്പെട്ടു. വൈസ് ചാന്സലര്മാര് ചില ബാഹ്യ സമ്മര്ദ്ദങ്ങള്ക്ക് വഴങ്ങി തീരുമാനങ്ങള് എടുക്കുന്ന രീതി ഇപ്പോഴുണ്ടെന്നും ചിലപ്പോഴെങ്കിലും വൈസ് ചാന്സലര്മാര് തങ്ങളുടെ അധികാരപരിധിക്ക് പുറത്ത് തീരുമാനമെടുക്കുകയും നിയമസംവിധാനങ്ങള് ആവശ്യപ്പെടുന്ന നടപടികള് സ്വീകരിക്കാതിരിക്കുകയും ചെയ്യുന്ന സാഹചര്യം ഉണ്ടെന്നും മന്ത്രി പറഞ്ഞു.
നിലവില് സിന്ഡിക്കേറ്റുകള് രണ്ടു മാസത്തിലൊരിക്കല് യോഗം ചേരണമെന്നാണ് ആക്ടുകളിലും സ്റ്റാറ്റിയൂട്ടുകളിലും നിബന്ധന. അല്ലെങ്കില് വൈസ് ചാന്സലര്ക്ക് ആവശ്യമെന്ന് തോന്നിയാല് യോഗം ചേരാമെന്നും നിബന്ധനയുണ്ട്. ഇതോടൊപ്പം മൂന്നിലൊന്ന് അംഗങ്ങള് രേഖാമൂലമാവശ്യപ്പെട്ടാല് ഏഴു ദിവസത്തിനകം സിന്ഡിക്കേറ്റ് യോഗം വിളിച്ച് ചേര്ക്കുന്നതിനാവശ്യമായ ഭേദഗതിയാണ് ഇപ്പോള് അവതരിപ്പിച്ചത്.
