ആലപ്പുഴ:ശബരിമലയില് ഉണ്ടായത് ഒരുകൂട്ടം ആളുകള് ചേര്ന്ന് നടത്തിയ സ്വര്ണക്കൊള്ളയാണ് എന്ന് എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന്. അയ്യപ്പന് ഭക്തന് കൊടുക്കുന്ന സമ്പത്ത് ആരും മോഷ്ടിച്ചുകൊണ്ടുപോകാന് പാടില്ല.
ശബരിമലയും തിരുവിതാംകൂര് ദേവസ്വം ബോര്ഡും അതുമായി ബന്ധപ്പെട്ട മോഷണവും ചൂഷണവും ഇന്ന് തുടങ്ങിയതല്ല.ഒരുപാട് വര്ഷങ്ങളായി ഇതുണ്ട്.കണ്ടുപിടിച്ചത് ഇപ്പോഴാണ് എന്നേയുള്ളൂ.
വ്യവസായിയായ വിജയ് മല്യ കൊടുത്ത മുപ്പതുകിലോയോളം സ്വര്ണം അവിടെയില്ലാ എന്നാണ് പറയുന്നത്. മുപ്പതുകിലോ സ്വര്ണം എത്ര കോടി വിലയുളളതാണ്. അത് ഓടിപ്പോവുകയോ പറന്നുപോവുകയോ ചെയ്യുന്ന സാധനമല്ല.
സ്വര്ണപ്പാളി നഷ്ടപ്പെട്ടതിനെക്കുറിച്ച് സമഗ്ര അന്വേഷണം നടത്തി കുറ്റക്കാരെ മാതൃകാപരമായി ശിക്ഷിക്കാനുള്ള നടപടി സര്ക്കാര് കൈക്കൊള്ളണമെന്നും അദ്ദേഹം ആവശ്യപ്പെട്ടു. ചെമ്പ് കൊണ്ടുപോയി എന്ന് പറയുന്നു. മഹസറിലും ചെമ്പാണെന്നാണ് പറയുന്നത്.
അതിന് മുകളിലിരുന്ന സ്വര്ണം എവിടെപ്പോയെന്ന് വെള്ളാപ്പള്ളി ചോദിച്ചു.മല്യ കൊടുത്ത കാലത്ത് ആ സ്വര്ണം പാളികളാക്കി പൊതിഞ്ഞിരുന്നത് ആണല്ലോ. ആ പാളി എടുത്തിട്ട് അതിന് താഴെയുള്ള ചെമ്പ് മാത്രം കൊടുത്തയച്ചു എന്ന് ആരെങ്കിലും പറഞ്ഞാല് എങ്ങനെ അതിനെ നിഷേധിക്കാനാകും.
ആഗോള അയ്യപ്പസംഗമം നടത്തിയതോടെ ആഗോളതലത്തിലെ വലിയൊരു കള്ളത്തരം കണ്ടെത്താന് സാധിച്ചത് നല്ലൊരു സംഭവവും ഐശ്വര്യവുമല്ലേ എന്നും വെള്ളാപ്പള്ളി ചോദിച്ചു. സര്ക്കാരിനെക്കാള് ഉത്തരവാദിത്വം ദേവസ്വം ബോര്ഡ് പ്രസിഡന്റിനും അംഗങ്ങള്ക്കുമാണ്. ആരുടെ കാലത്ത് എപ്പോള് ചെയ്തുവെന്ന് അന്വേഷിച്ച് സത്യം പുറത്തുകൊണ്ടുവരട്ടേയെന്നും വെള്ളാപ്പള്ളി പറഞ്ഞു.
