കോട്ടയം : വെച്ചൂര് പശു സംരക്ഷണ കേന്ദ്രം ആരംഭിച്ച പ്രവാസി വ്യവസായി മുരളീധരന് നായരെ അഭിനന്ദിച്ച് കേന്ദ്രമന്ത്രി ജോര്ജ് കുര്യന്. വൈക്കം ആറാട്ടുകുളങ്ങരയിലാണ് അന്തരിച്ച ഭാര്യ ഗീതാ മുരളീധരനു സ്മരണാഞ്ജലി ആയി മുരളീധരന് നായര് വെച്ചൂര് പശുക്കളുടെ സംരക്ഷണത്തിനായി കേന്ദ്രം ആരംഭിച്ചത്. അതിന്റെ ഉദ്ഘാടനം നിര്വഹിച്ചു സംസാരിക്കുകയായിരുന്നു കേന്ദ്രമന്ത്രി. ആംറോ ഡയറിസ് എന്ന മാതൃസ്ഥാപനത്തിന്റെ കീഴില് തുടങ്ങിയ പ്രോജക്ടിന്റെ പാല്, പാല് ഉല്പ്പന്ന വിതരണവും സെന്റര് ഫോര് എക്സലന്സിന്റെ ഉദ്ഘാടനവും അദ്ദേഹം നിര്വഹിച്ചു.
കേരളത്തിന്റെ തനത് സമ്പത്തായ വെച്ചൂര് പശുക്കളുടെ സംരക്ഷണത്തിന് കേന്ദ്രസര്ക്കാര് മുന്തിയ പ്രാധാന്യമാണ് നല്കുന്നത് കേന്ദ്രമന്ത്രി പറഞ്ഞു.
വംശനാശം സംഭവിക്കുന്ന വെച്ചൂര് പശുക്കള്ക്ക് പുനര്ജന്മം നല്കുന്ന പദ്ധതി അങ്ങേയറ്റം അഭിനന്ദനീയമാണ്. നാടന് പശുക്കളുടെ സംരക്ഷണത്തിനും ക്ഷീര വിപ്ലവത്തിനുമായി കേന്ദ്രസര്ക്കാര് നിരവധി പദ്ധതികളാണ് ആവിഷ്കരിച്ചിട്ടുള്ളത്. രാജ്യത്തെ ക്ഷീര മേഖലയുടെ വികസനത്തില് സ്വന്തം കയ്യൊപ്പ് ചാര്ത്തുകയാണ് മുരളിധരന്നായര് .സര്ക്കാര് ധനസഹായം ചോദിക്കാതെ നാടിനും സംരംഭകര്ക്കും പ്രയോജനം ലഭിക്കുന്ന പദ്ധതിയാണ് ഇത്. വെച്ചൂര് പശുക്കളുടെ സംരക്ഷണത്തിനായി ജീവിതം ഉഴിഞ്ഞുവെച്ച ഡോ.ശോശാമ്മ ഐപ്പിനെ ഭാരതസര്ക്കാര് പത്മശ്രീ നല്കിയാണ് ആദരിച്ചത്. ഈ മേഖലയ്ക്ക് സര്ക്കാര് പുലര്ത്തുന്ന താല്പര്യത്തിന്റെ ഉത്തമ ദൃഷ്ടാന്തമാണിത് – കേന്ദ്ര മന്ത്രി പറഞ്ഞു.
