കോഴിക്കോട്: ചേവരമ്പലത്ത് ഡോക്ടറുടെ വീട് കുത്തിത്തുറന്ന് 40 പവനോളം ആഭരണങ്ങള് കവര്ന്നു. കോഴിക്കോട് മെഡിക്കല് കോളേജിലെ അനസ്തേഷ്യ വിഭാഗത്തിലെ ഡോ. ഗായത്രിയുടെ വീട്ടിലാണ് ഞായറാഴ്ച പുലര്ച്ചെ മോഷണം നടന്നത്.
ചേവായൂര് പൊലീസ് കേസെടുത്ത് അന്വേഷണം ആരംഭിച്ചു. പുലര്ച്ചെ 1.55 ഓടെയാണ് മോഷ്ടാവ് വീട്ടിലേക്ക് പ്രവേശിച്ചതെന്ന് സിസി ടിവി ദൃശ്യങ്ങളില് വ്യക്തമാണ്.
മുന് വാതില് തുറന്നാണ് അലമാരയിലും മേശയിലുമായി സൂക്ഷിച്ച 40 പവനോളം മോഷ്ടിച്ചത്. ഈ മാസം 11ാംതീയതി മുതല് വീട് പൂട്ടിക്കിടക്കുകയായിരുന്നു.
സ്വദേശമായ തിരുവനന്തപുരത്ത് നിന്നും ഡോ ഗായത്രി ഇന്ന് ഉച്ചയോടെ വീട്ടില് തിരിച്ചെത്തിയപ്പോഴാണ് മോഷണവിവരം അറിയുന്നത്. ചേവായൂര് സ്റ്റേഷന് പരിധിയില് രണ്ടാഴ്ചക്കിടെ നടക്കുന്ന രണ്ടാമത്തെ വലിയ മോഷണമാണിത്. ആളില്ലാത്ത വീട്ടില് നിന്ന് 20 പവനോളം സ്വര്ണം അടുത്തിടെ കവര്ന്നിരുന്നു.
