തിരുവനന്തപുരം : അയ്യപ്പസംഗമത്തില് പങ്കെടുക്കുകയും സംസ്ഥാന സര്ക്കാരിനോട് അനുഭാവം പ്രകടിപ്പിക്കുകയും ചെയ്ത എന് എസ് എസിനെ അനുനയിപ്പിക്കാന് മാര്ഗങ്ങള് ആരായുകയാണ് കോണ്ഗ്രസ്.അതിനാല് തന്നെ ഇടത് ചായ് വ് പ്രകടമാക്കിയിട്ടും എന് എസ് എസിനെയോ ജനറല് സെക്രട്ടറി ജി സുകുമാരന് നായരെയോ കൂടുതല് പ്രകോപിപ്പിക്കാതെ നയപരമായ സമീപനമാണ് കോണ്ഗ്രസ് കൈക്കൊളളുന്നത്.
എന്എസ്എസുമായോ ഒരു സാമൂദായിക സംഘടനകളുമായോ അകല്ച്ചയില്ലെന്ന് യു ഡി എഫ് കണ്വീനര് അടൂര് പ്രകാശ് എം പി പറഞ്ഞു. എല്ലാ സമുദായ സംഘടനകളുമായും നല്ല ബന്ധമാണുള്ളത്. ജി സുകുമാരന് നായരെ നേരില് കാണുമെന്നും അദ്ദേഹം പറഞ്ഞു.
സിപിഎമ്മുമായി സുകുമാരന് നായര്ക്ക് അനുഭാവമുള്ളതായി തോന്നുന്നില്ലെന്ന് അടൂര് പ്രകാശ് പറഞ്ഞു.അദ്ദേഹത്തിനെതിരെ ഫ്ളക്സ് ഉയര്ത്തിയത് ആരാണെന്ന് അറിയില്ലെന്നും മാധ്യമങ്ങളില് കണ്ടാണ് താന് ഈ വിവരം അറിയുന്നതെന്നും അടൂര് പ്രകാശ് പറഞ്ഞു. ശബരിമലയിലെ സ്വര്ണ പീഠത്തിലെ തൂക്കം കുറഞ്ഞ സംഭവത്തെ കുറിച്ചും അദ്ദേഹം പ്രതികരിച്ചു. സ്വര്ണ പീഠത്തിന്റെ തൂക്കം കുറഞ്ഞത് അന്വേഷണ ഉദ്യോഗസ്ഥര് കണ്ടെത്തട്ടെ . റേഷന് ഡിപ്പോയുമായി ബന്ധപ്പെട്ട വിജിലന്സ് കേസില് തനിക്കെതിരെ അപ്പീല് പോകുന്നത് തിരഞ്ഞെടുപ്പ് മുന്നില് കണ്ടാണെന്നും അടൂര് പ്രകാശ് വ്യക്തമാക്കി.
അതേസമയം, സുകുമാരന് നായര്ക്കെതിരെ പാലക്കാട് ഷൊര്ണൂര് നഗരത്തില് ഫ്ലക്സ് ബോര്ഡുകള് ഉയര്ന്നു.സേവ് എന്എസ്എസ് എന്ന പേരിലാണ് ഫ്ലക്സ് ബോര്ഡുകള് സ്ഥാപിച്ചിട്ടുള്ളത് .
