കൊച്ചി: കണ്ണൂര് മുന് ജില്ലാ പഞ്ചായത്ത് പ്രസിഡന്റായിരിക്കെ എ ഡി എം നവീന് ബാബുവിന്റെ മരണത്തില് രാജിവയ്ക്കേണ്ടി വന്ന സിപിഎം നേതാവ് പി പി ദിവ്യയ്ക്കെതിരെ വിജിലന്സ് അന്വേഷണം വേണമെന്ന ആവശ്യത്തില് രണ്ട് മാസത്തിനകം തീരുമാനമെടുക്കണമെന്ന് സര്ക്കാരിനോട് ഹൈക്കോടതി.ബിനാമി ഇടപാടുകളുമായി ബന്ധപ്പെട്ടാണ് ദിവ്യയ്ക്കെതിരെ വിജിലന്സ് അന്വേഷണം വേണമെന്ന ആവശ്യം.
സര്ക്കാര് തീരുമാനമെടുത്തില്ലെങ്കില് ഹര്ജിക്കാരന് വീണ്ടും ഹൈക്കോടതിയെ സമീപിക്കാമെന്ന് കോടതി പറഞ്ഞു.കണ്ണൂരിലെ കെഎസ്യു നേതാവ് മുഹമ്മദ് ഷമ്മാസിന്റെ ഹര്ജി യിലാണ് ഹൈക്കോടതി ഉത്തരവ്. ജില്ലാ പഞ്ചായത്ത് പ്രസിഡന്റ് ആയിരിക്കെ പി പി ദിവ്യ കാര്ട്ടണ് ഇന്ത്യ അലയന്സ് പ്രൈവറ്റ് ലിമിറ്റഡ് എന്ന പേരില് ബിനാമി കമ്പനി ആരംഭിച്ചെന്നാണ് ഹര്ജിയിലെ ആരോപണം. ഈ കമ്പനിക്ക് ജില്ലാ പഞ്ചായത്തിലെ നിര്മ്മാണ കരാറുകള് നല്കിയതില് അഴിമതി ഉണ്ടെന്നും ആക്ഷേപമുണ്ട്.
ദിവ്യ ജില്ലാ പഞ്ചായത്ത് പ്രസിഡന്റ് ആയിരിക്കെ 11കോടിയോളം രൂപയുടെ കരാറുകള് കമ്പനിക്ക് നല്കി. കാര്ട്ടന് ഇന്ത്യ അലയന്സ് എന്ന കമ്പനിയുടെ ഡയറക്ടര് ആസിഫും ദിവ്യയുടെ ഭര്ത്താവും ചേര്ന്നാണ് ഭൂമി ഇടപാടുകള് നടത്തിയത്. കണ്ണൂര് പാലക്കയം തട്ടില് മുഹമ്മദ് ആസിഫിന്റെയും ദിവ്യയുടെ ഭര്ത്താവ് അജിത്തിന്റെയും പേരില് വാങ്ങിയത് നാലേക്കര് ഭൂമിയാണെന്ന് മുഹമ്മദ് ഷമ്മാസ് ആരോപിക്കുന്നു. സ്ഥലം രജിസ്റ്റര് ചെയ്ത രേഖകളും മുഹമ്മദ് ഷമ്മാസ് പുറത്തുവിട്ടു.
നേരത്തേ പെട്രോള് പമ്പുമായി ബന്ധപ്പെട്ടും ദിവ്യയുടെ ഭര്ത്താവിനെതിരെ ആരോപണങ്ങളുണ്ടായിരുന്നു.
