കൊല്ലം: ഷാര്ജയില് കൊല്ലം സ്വദേശിനി അതുല്യ ജീവനൊടുക്കിയ കേസിലെ പ്രതി സതീഷിന്റെ മുന്കൂര് ജാമ്യം റദ്ദാക്കണമെന്ന ഹര്ജിയില് വാദം കേള്ക്കുന്നത് കൊല്ലം പ്രിന്സിപ്പല് സെഷന്സ് കോടതി 23 ലേക്ക് മാറ്റി. ഫൊറന്സിക് പരിശോധനാ ഫലം വൈകുന്നതിനാലാണ് കേസ് മാറ്റിയത്. 23 ന് കേസ് ഡയറി ഹാജരാക്കണമെന്നും നിര്ദേശമുണ്ട്.
അതുല്യയെ മര്ദ്ദിക്കുന്ന ദൃശ്യങ്ങളുടെ കാലപ്പഴക്കം നിര്ണയിക്കുന്നതിനാണ് ഫോറന്സിക് പരിശോധന. സതീഷിനെതിരെ കൊലപാതക കുറ്റത്തിന് തെളിവുകള് ഇല്ലെന്ന് കാട്ടിയാണ് ഇടക്കാല ജാമ്യം അനുവദിച്ചിട്ടുളളത്. അതുല്യയുടേത് തൂങ്ങിമരണം ആണെന്നാണ് കോണ്സുലേറ്റ് നല്കിയ പോസ്റ്റ്മോര്ട്ടം റിപ്പോര്ട്ട് എന്നും ചൂണ്ടിക്കാട്ടിയിരുന്നു.വ്യവസ്ഥകളോടെയാണ് കോടതി ജാമ്യം അനുവദിച്ചത്.
അതുല്യയുടേത് കൊലപാതകം ആണെന്നാണ് മാതാപിതാക്കള് പറയുന്നത്.പരാതിക്ക് പിന്നാലെ അന്വേഷണം ക്രൈംബ്രാഞ്ച് ഏറ്റെടുത്തിട്ടുണ്ട്. ജൂലായ് 19നാണ് അതുല്യയെ ഷാര്ജയിലെ ഫ്ലാറ്റില് തൂങ്ങിമരിച്ച നിലയില് കണ്ടെത്തിയത്. ഇതിന് ശേഷം അതുല്യയെ ക്രൂരമായി സതീഷ് മര്ദിക്കുന്ന ദൃശ്യങ്ങള് പുറത്തുവന്നിരുന്നു.
