തൃശൂര്: ഹൈക്കോടതി ഉത്തരവിനെ തുടര്ന്ന് ഇരിങ്ങാലക്കുട കൂടല്മാണിക്യം ക്ഷേത്രത്തില് ഈഴവ സമുദായത്തില് നിന്നുള്ള കെ എസ് അനുരാഗ് കഴകം ജോലിയില് പ്രവേശിച്ചു.എതിര്പ്പുയര്ന്നതിനെ തുടര്ന്ന് ആദ്യം ജോലിയില് പ്രവേശിച്ച ആര്യനാട് സ്വദേശി ബാലു ജോലി രാജിവെച്ചതിനെ തുടര്ന്നാണ് റാങ്ക് പട്ടികയില് അടുത്ത ഊഴക്കാരനായ അതേ സമുദായത്തിലെ ചേര്ത്തല സ്വദേശി അനുരാഗിനെ പകരം നിയമിക്കാന് ദേവസ്വം ബോര്ഡ് തീരുമാനിച്ചത്.
എല്ലാവരുടെയും പിന്തുണയും ഉണ്ടാകണമെന്നും സമാധാനത്തോടെ ജോലി ചെയ്യാന് കഴിയണമെന്നും അനുരാഗും കുടുംബവും പറഞ്ഞു.
തെക്കേ വാര്യത്തെ ടിവി ഹരികൃഷ്ണന് കഴകം ജോലി പാരമ്പര്യമായുളളത് ആണെന്ന് പറഞ്ഞ് ഹൈക്കോടതിയെ സമീച്ചെങ്കിലും കോടതി അതംഗീകരിച്ചില്ല.രണ്ട് ദിവസം മുമ്പ് കോടതി ഉത്തരവ് വന്നതിനെ തുടര്ന്നാണ് അനുരാഗ് ജോലിയില് പ്രവേശിച്ചത്. ഹര്ജിക്കാര്ക്ക് സിവില് കോടതിയെ സമീപിക്കാമെന്നും കോടതി പറഞ്ഞു.
തിങ്കളാഴ്ച ദേവസ്വം ബോര്ഡിന്റെ കൂടല്മാണിക്യം ക്ഷേത്ര ഓഫീസില് എത്തി അനുരാഗ് ജോലിയില് പ്രവേശിച്ചു. കോടതി ഉത്തരവിന് ശേഷം ദേവസ്വം ബോര്ഡ് വിളിച്ച യോഗത്തില് കേസില് കക്ഷികളായ തന്ത്രിമാര് ഉള്പ്പെടെ പങ്കെടുത്തില്ല.
