ന്യൂദല്ഹി: നേപ്പാള് മോഡല് ഭരണ അട്ടിമറിക്ക് വേണ്ടി കലാപമുണ്ടാക്കാന് രാഹുല് ഗാന്ധി ശ്രമിക്കുന്നുണ്ടെന്ന് ബിജെപി എംപി നിഷികാന്ത് ദുബെ. വിദേശശക്തികളുമായി കൂട്ടുചേര്ന്നാണ് നിലവിലെ മോദി ഭരണം അട്ടിമറിക്കാനുള്ള ടൂള്കിറ്റ് നടപ്പാക്കാന് രാഹുല് ഗാന്ധി ശ്രമിക്കുന്നതെന്നും നിഷികാന്ത് ദുബെ പറഞ്ഞു.
പക്ഷെ ഇങ്ങിനെ ഒരു കലാപമുണ്ടായാല് ഇന്ത്യയില് നിന്നും ഓടിപ്പോകേണ്ടിവരിക ഗാന്ധി കുടുംബത്തിനാണെന്നും നിഷികാന്ത് ദുബെ മുന്നറിയിപ്പ് നല്കി. ശ്രീലങ്കില് നടന്നതുപോലെ, പിന്നീട് ബംഗ്ലാദേശില് സംഭവിച്ചതുപോലെ അതിന് ശേഷം നേപ്പാളില് സംഭവിച്ചതുപോലെ ഇന്ത്യയിലും അട്ടിമറി നടത്താന് രാഹുല് ശ്രമിച്ചു.- നിഷികാന്ത് ദുബെ ആരോപിക്കുന്നു.
തൊഴിലില്ലായ്മയും പട്ടിണിയും ആണ് നേപ്പാളിലെ കലാപത്തിന് കാരണമെന്നും ഇത് ഇന്ത്യയ്ക്ക് ഒരു മുന്നറിയിപ്പാണെന്നും ഉദ്ധവ് താക്കറെ പക്ഷം ശിവസേന അഭിപ്രായപ്പെട്ടിരുന്നു. എന്നാല് ഇത് പ്രതിപക്ഷ പാര്ട്ടികളുടെ ഒരു ഗൂഢപദ്ധതി മാത്രമാണെന്നും ബിജെപി ആരോപിക്കുന്നു.”വോട്ട് മോഷണം എന്ന ആരോപണം തെരഞ്ഞെടുപ്പ് കമ്മീഷനെതിരെ രാഹുല് ഗാന്ധി ഉയര്ത്തി.ഇലക്ഷന് കമ്മീഷനില് കൃത്രിമം കാട്ടി ബിജെപി അനുകൂലമായ വിജയം നേടുന്നു എന്നാണ് രാഹുല് ഗാന്ധിയുടെ ആരോപണം. എങ്കില് 2024 ലോക് സഭാ ഇലക്ഷനില് ഇതേ തെരഞ്ഞെടുപ്പ് കമ്മീഷനും ഇതേ ഇലക്ട്രോണിക് വോട്ടിംഗ് യന്ത്രവും ഉപയോഗിച്ച് മഹാരാഷ്ട്രയില് കൂടുതല് സീറ്റ് നേടിയത് ഇന്ത്യാമുന്നണിയല്ലേ?”- നിഷികാന്ത് ദുബെ ചോദിക്കുന്നു. അന്ന് ആകെയുള്ള 48 ലോക് സഭാ സീറ്റില് 30 സീറ്റുകള് ഇന്ത്യാ മുന്നണി നേടി. എന്ഡിഎയ്ക്ക് കിട്ടിയത് വെറും 18 സീറ്റുകളാണ്. രാഹുല് ഗാന്ധി ഇന്ത്യയില് ഇത്തരം വ്യാജമായ ആരോപണങ്ങള് ഉയര്ത്തുന്നത് ജോര്ജ്ജ് സോറോസിന്റെ സഹായത്തോടെയാണ്.- അദ്ദേഹം പറഞ്ഞു.
