കൊച്ചി: മദ്യപിച്ച് വാഹന പരിശോധന നടത്തിയ അസിസ്റ്റന്റ് മോട്ടോര് വെഹിക്കിള് ഇന്സ്പെക്ടര് എന് എസ്. ബിനുവിനെ സസ്പെന്റ് ചെയ്തതായി ഗതാഗത കമ്മീഷണര് അറിയിച്ചു. വകുപ്പ് തല അന്വേഷണത്തിനും ഉത്തരവിട്ടു. ബിനുവിനെതിരെ പൊലീസ് കേസെടുത്തതിനു പിന്നാലയാണ് വകുപ്പുതല നടപടി. കാക്കനാട് തോപ്പില് ജങ്ഷനില് മീന് വില്പ്പന നടത്തുകയായിരുന്ന ദമ്പതികളുമായി തര്ക്കമുണ്ടാവുകയും ഡ്യൂട്ടിയില് അല്ലാതെ മദ്യപിച്ചാണ് ബിനു എത്തിയതെന്ന് മനസിലായതോടെ നാട്ടുകാര് ഇയാളെ തടഞ്ഞുവച്ച് പൊലീസില് ഏല്പ്പിക്കുകയുമായിരുന്നു. തൃക്കാക്കര പൊലീസ് ബ്രെത്ത് അനലൈസര് ഉപയോഗിച്ച് മദ്യപിച്ചിട്ടുണ്ടെന്ന് പരിശോധിച്ച് ഉറപ്പുവരുത്തിയശേഷമാണ് കസ്റ്റഡിയിലെടുത്തതും കേസെടുത്തതും. മദ്യപിച്ച് വാഹനമോടിക്കുന്നതിന്റെയും നാട്ടുകാരുമായി തര്ക്കിക്കുന്നതിന്റെയും ദൃശ്യങ്ങളും പുറത്തുവന്നിരുന്നു.
