കോട്ടയം: കാലിക്കട്ട് സര്വകലാശാലയില് ഫിസിക്കല് എഡ്യുക്കേഷന് ഡയറക്ടറായി ഡോ. സക്കീര് ഹുസൈന് നിയമനം ലഭിച്ചിരിക്കുന്നത് നോട്ടിഫിക്കേഷനില് പറഞ്ഞിരിക്കുന്ന മാനദണ്ഡങ്ങള്ക്ക് കടകവിരുദ്ധം. യൂണിവേഴ്സിറ്റി 2014 സെപ്റ്റംബര് നാലാം തീയതി ഡയറക്ടര് തസ്തികയിലേക്ക് വിജ്ഞാPhysicalപനം പുറപ്പെടുവിപ്പിച്ചുകൊണ്ട് ഇറക്കിയ നോട്ടീസില് പരാമര്ശിച്ചിരിക്കുന്നത് ഉദ്യോഗാര്ത്ഥികള്, എം.ഫില് അല്ലെങ്കില് പിഎച്ച്ഡി ബിരുദം നേടാന് എടുക്കുന്ന കാലയളവ്, തസ്തികകളിലേക്കുള്ള നിയമനത്തിന് ബാധകമായ അധ്യാപന/ഗവേഷണ പരിചയമായി കണക്കാക്കില്ല എന്നതാണ്.
2009ല് സെലക്ഷന് ഗ്രേഡായ ശേഷം 2015ലാണ് സക്കീര് ഹുസൈനെ ഫിസിക്കല് എഡ്യുക്കേഷന് ഡയറക്ടറായി നിയമിക്കുന്നത്. 2007ലാണ് അദ്ദേഹത്തിന് പിഎച്ച്ഡി ലഭിക്കുന്നത്. സെലക്ഷന് ഗ്രേഡായി 15 വര്ഷത്തെ പരിചയസമ്പത്ത് വേണമെന്നിരിക്കേ എട്ടു വര്ഷം മാത്രം പ്രവര്ത്തിപരിചയമുള്ളയാള്ക്ക് എങ്ങനെ നിയമനം നേടാനാകുന്നു എന്നതാണ് ഉയരുന്ന ചോദ്യം. അതേസമയം, സെലക്ഷന് ഗ്രേഡായി 15 വര്ഷത്തെ പ്രവര്ത്തിപരിചയം വേണ്ടെന്നും ആകെ 15 വര്ഷത്തെ പ്രവര്ത്തിപരിചയം മാത്രം മതിയെന്നാണ് സക്കീര് ഹുസൈന്റെ നിലപാട്.
അതേസമയം, സക്കീറിന്റെ യോഗ്യതാ പ്രശ്നം ഉന്നയിച്ച് കോഴിക്കോട് സ്വദേശി വിവരാവകാശനിയമപ്രകാരം ചോദിച്ച ചോദ്യവും ഉത്തരവും ഇപ്രകാരമാണ്:
19.06.2015ന് ഡയറക്ടര് ഓഫ് ഫിസിക്കല് എഡ്യൂക്കേഷന് തസ്തികയില് നിയമിതനായ ഡോ. സക്കീര് ഹുസൈന് വി.പി. അവറുകള്ക്ക് പിഎച്ച്ഡി ഡിഗ്രി കരസ്ഥമാക്കിയതിന് ശേഷം 10 വര്ഷം യൂണിവേഴ്സിറ്റി ഡെപ്യൂട്ടി ഡയറക്ടര് അല്ലെങ്കില് കോളേജ് ഡെപ്യൂട്ടി ഡയറക്ടര് അല്ലെങ്കില് യൂണിവേഴ്സിറ്റി അസോസിയേറ്റ് പ്രൊഫസര് അല്ലെങ്കില് കോളേജ് അസോസിയേറ്റ് പ്രൊഫസര് തസ്തികയില് അല്ലെങ്കില് 15 വര്ഷം യൂണിവേഴ്സിറ്റി അസിസ്റ്റന്റ് ഡയറക്ടര് അല്ലെങ്കില് കോളേജ് അസിസ്റ്റന്റ് ഡയറക്ടര് അല്ലെങ്കില് യൂണിവേഴ്സിറ്റി അസിസ്റ്റന്റ് പ്രൊഫസര് അല്ലെങ്കില് കോളേജ് അസിസ്റ്റന്റ് പ്രൊഫസര് തസ്തികയില് പ്രവര്ത്തി പരിചയം 07.04.2015ന് മുമ്പ് ഉണ്ടായിരുന്നോ? എന്നാതായിരുന്നു ചോദ്യം. ഈ ചോദ്യത്തിന് മറുപടി ലഭിച്ചിരിക്കുന്നത് ഉണ്ടായിരുന്നില്ല എന്നതാണ്.
എല്ലാ യോഗ്യതയോടെയുമാണ് നിയമനം നേടിയത്: ഡോ. സക്കീര് ഹുസൈന്
കോട്ടയം: യുജിസിയുടെ എല്ലാ മാനദണ്ഡങ്ങളും പാലിച്ചുള്ള നോട്ടിഫിക്കേഷന് പ്രകാരം അപേക്ഷ നല്കി തെരഞ്ഞെടുക്കപ്പെട്ടാണ് താന് ഫിസിക്കല് എഡ്യുക്കേഷന് ഡയറക്ടറായി നിയമിതനായതെന്ന് കാലിക്കട്ട് യൂണിവേഴ്സിറ്റി ഫിസിക്കല് എഡ്യുക്കേഷന് ഡയറക്ടര് ഡോ. വി.പി. സക്കീര് ഹുസൈന്. മതിയായ യോഗ്യതാ മാനദണ്ഡങ്ങള് പാലിക്കാതെയാണ് സക്കീര് ഹുസൈന് യൂണിവേഴ്സിറ്റിയില് ഡയറക്ടറായി നിയമനം ലഭിച്ചതെന്ന വിവരാവകാശ രേഖയെ മുന്നിര്ത്തി ജന്മഭൂമിയില് പ്രസിദ്ധീകരിച്ച റിപ്പോര്ട്ടിനോട് പ്രതികരിക്കുകയായിരുന്നു അദ്ദേഹം. നാല് വൈസ് ചാന്സലര്മാരടങ്ങിയ ഒരു കമ്മിറ്റി പരിശോധിച്ചാണ് നോട്ടിഫിക്കേഷന് പുറപ്പെടുവിച്ചിരിക്കുന്നത്. അതില് തെറ്റുപറ്റിയതായി കരുതുന്നില്ല. 15 വര്ഷത്തെ പരിചയസമ്പത്തും പിഎച്ച്ഡിയും തനിക്കുണ്ടെന്നും അത് മതിയായ യോഗ്യതയായി പരിഗണിച്ചുകൊണ്ടാണ് തനിക്ക് നിയമനം ലഭിച്ചതെന്നും അദ്ദേഹം പറഞ്ഞു. പിഎച്ച്ഡിയോടു കൂടി സെലക്ഷന് ഗ്രേഡായി 15 വര്ഷത്തെ പരിചയസമ്പത്ത് ഡയറക്ടറാകാന് ആവശ്യമില്ല. അങ്ങനെയെങ്കില് 28-ാം വയസില് ജോലി ലഭിക്കുന്ന ഒരാള്ക്ക് ഡയറക്ടറാകണമെങ്കില് എത്രയോ പ്രായമാകണം?.- സക്കീര് ഹുസൈന് ചോദിക്കുന്നു.
ഇക്കാര്യത്തില് തനിക്കെതിരായ ഒരു കേസ് ഹൈക്കോടതിയില് നിലനില്ക്കുന്നുണ്ടെന്നും അദ്ദേഹം കൂട്ടിച്ചേര്ത്തു.
