ടിയാന്ജിന്: ഭാരതവും റഷ്യയും ചൈനയും ഏറെനാളുകള്ക്കുശേഷം ഒന്നിച്ചെത്തുകയും ഒരേ നിലപാടിലേക്ക് എത്തുകയും ചെയ്ത അസാധാരണവും അത്യപൂര്വ്വവുമായ നിമിഷങ്ങള്ക്ക് വേദിയായി എസ്സിഒ ഉച്ചകോടി. ഭീകരതയ്ക്കെതിരെ ശക്തമായ നടപടി സ്വീകരിക്കണമെന്ന പ്രധാനമന്ത്രി നരേന്ദ്രമോദിയുടെ പ്രസ്താവനയ്ക്കുള്ള അംഗീകാരമായി എസ്സിഒയുടെ സംയുക്ത പ്രസ്താവന. പാകിസ്ഥാന് അടക്കം പ്രസ്താവനയുടെ ഭാഗമായി.
പ്രധാനമന്ത്രി നരേന്ദ്രമോദി, റഷ്യന് പ്രസിഡന്റ് വ്ളാദിമീര് പുടിന്, ചൈനീസ് പ്രസിഡന്റ് ഷി ജിന്പിങ് എന്നിവരുടെ ഹ്രസ്വകൂടിക്കാഴ്ച ക്യാമറക്കണ്ണുകള് ഒപ്പിയെടുത്തു. മിനിറ്റുകള് മാത്രമെ ഈ കൂടിക്കാഴ്ച നീണ്ടുനിന്നുള്ളൂ എങ്കിലും ഇതേക്കുറിച്ചുള്ള നിരീക്ഷണങ്ങളും വിലയിരുത്തുലുകളും അനവധിയാണ്. അമേരിക്കന് പ്രസിഡന്റ് ഡൊണാള്ഡ് ട്രംപിന്റെ താരിഫ് ഉയര്ത്തല് ഭീഷണി നിലനില്ക്കെയാണ് കൂടിക്കാഴ്ചയും ഉഭയകക്ഷിചര്ച്ചകളും എന്നതാണ് ഇതിനുള്ള പ്രധാനകാരണം. പഹല്ഗാം ആക്രമണത്തിനും ഓപ്പറേഷന് സിന്ദൂറിനുംശേഷം ഭാരത-പാകിസ്ഥാന് പ്രധാനമന്ത്രിമാര് ഒരുമിച്ചുവന്ന എസ്സിഒ ഉച്ചകോടിയായിരുന്നു ഇത്. റഷ്യന് പ്രസിഡന്റ് വ്ളാദിമീര് പുടിനും പ്രധാനമന്ത്രി നരേന്ദ്രമോദിയും ചൈനീസ് പ്രസിഡന്റ് ഷി ജിന്പിങും പാകിസ്ഥാന് പ്രധാനമന്ത്രി ഷെഹ്ബാസ് ഷെരീഫിനെ നോക്കുകപോലും ചെയ്യാതെ കടന്നുപോകുന്ന ദൃശ്യങ്ങളും ഇതിനകം പുറത്തുവന്നു. എസ്സിഒ വേദിയില് പാകിസ്ഥാന് ഒറ്റപ്പെട്ടെന്ന രീതിയിലാണ് പ്രതികരണങ്ങള് വരുന്നത്.
റഷ്യന് പ്രസിഡന്റ് വ്ളാദിമീര് പുടിനൊപ്പം പ്രധാനമന്ത്രി നരേന്ദ്രമോദി കാറില് യാത്ര ചെയ്തതും അസാധാരണവും അപ്രതീക്ഷിതവുമായിരുന്നു. ഉഭയകക്ഷി ചര്ച്ച നടത്താന് നിശ്ചയിച്ചിരുന്ന ടിയാന്ജിനിലെ റിറ്റ്സ് കാള്ട്ടണിലേക്കായിരുന്നു ഇരുവരുടെയും യാത്ര. പുടിനൊപ്പമുള്ള യാത്രയുടെ ചിത്രങ്ങള് പ്രധാനമന്ത്രി എക്സില് പങ്കുവെക്കുകയും ചെയ്തു. ഭാരതവും റഷ്യയും ചൈനയും തമ്മിലുള്ള സഹകരണവും സൗഹൃദവും കൂടുതല് ദൃഢമാകുന്നതിന്റെ സൂചനകളാണ് പുറത്തുവരുന്നത്.
