കൊച്ചി: ഇനി മിക്സി വേണ്ട, അരകല്ല് വേണ്ട ഒരു ഫോണ്കോളില് എല്ലാ അരപ്പും അടുക്കളയില് എത്താന് നിമിഷ നേരം മാത്രം മതി. ഇത് പാഴ്വാക്കല്ല. കോവിലകത്തും കടവിലെ വനിതാ സംരംഭം അതിനും വഴിയൊരുക്കുന്നു.
പള്ളിപ്പുറം ഗ്രാമപഞ്ചായത്തിലെ കോവിലകത്തുംകടവില് നൂതനമായി പ്രവര്ത്തിച്ചുവരുന്ന കുടുംബശ്രീ സംരംഭമാണ് ടേസ്റ്റി കിങ്. അഞ്ച് കുടുംബശ്രീ വനിതകള് ചേര്ന്നാണ് സ്ഥാപനം നടത്തുന്നത്. എം.എസ്. സ്വാമിനാഥന് ഫൗണ്ടേഷന് റിസര്ച്ച് ഇന്ത്യയുടേയും, കുടുംബശ്രീ പ്രോജക്ടിന്റെയും, ബാങ്ക് ധനസഹായത്തോടെയും ആണ് ടേസ്റ്റി കിങ് പ്രവര്ത്തനം ആരംഭിച്ചത്. രണ്ടുവര്ഷമായി അനുഭവസമ്പത്തുള്ള പ്രവര്ത്തന പാരമ്പര്യത്തോടെ ഇന്നും നന്നായി പ്രവര്ത്തിച്ചുവരുന്നു. പച്ച അരപ്പ് കിലോയ്ക്ക് 360 രൂപയും, വറുത്ത അരപ്പ് കിലോയ്ക്ക് 600 രൂപയും, ചിരകിയ തേങ്ങയ്ക്ക് (പീര) 260 രൂപയ്ക്കും, ഇവര് വിപണിയില് കൊടുക്കുന്നു. നാടന് തേങ്ങ മാത്രം ഉപയോഗിച്ചുള്ള ഇവരുടെ പാചകരീതിക്ക് മികച്ച രീതിയിലുള്ള പ്രതികരണമാണ് ലഭിക്കുന്നത്. ഭക്ഷ്യ സുരക്ഷാ സംവിധാനത്തോടുകൂടിയാണ് യൂണിറ്റ് പ്രവര്ത്തിക്കുന്നത്. ഫുഡ് ലൈസന്സും ഹെല്ത്ത് കാര്ഡും ഇവര്ക്ക് ലഭിച്ചിട്ടുണ്ട്. തേങ്ങയരപ്പു കൂടാതെ പരിപ്പ് വരട്ടിയ പായസം, മിക്സഡ് അച്ചാര്, വടുകപ്പുളി അച്ചാര്, ഉണ്ണിയപ്പം, അവലോസ് പൊടി, അവലോസ് ഉണ്ട, കായ വറുത്തത്, ശര്ക്കര വരട്ടി എന്നിവ ഓണം വിപണിയെ ലക്ഷ്യമാക്കി ഇവര് തയ്യാറാക്കുന്നുണ്ട്. കാറ്ററിങ് വിഭാഗത്തിലേക്കും ഇവരുടെ പ്രവര്ത്തനം വിപുലീകരിച്ചിട്ടുണ്ട്.
വറുത്തരപ്പിനായി ഒരു ദിവസം നൂറു തേങ്ങയുടെ ഉപയോഗമാണ് ഇവര് ചെയ്തുവരുന്നത്. വറുത്തരപ്പില് കുരുമുളക്, വേപ്പില, വെളുത്തുള്ളി എന്നിവ ചേര്ത്താണ് ഇവര് തയ്യാറാക്കുന്നത്. സാധാ തേങ്ങയരപ്പില് മഞ്ഞള്പൊടി മാത്രമാണ് ചേര്ക്കുന്നത്. രാവിലെ 10 മുതല് 5.30 വരെയാണ് ഇവരുടെ യൂണിറ്റ് പ്രവര്ത്തിക്കുന്നത്.
ഈ അഞ്ചു പേരടങ്ങുന്ന സംരംഭത്തില് അശ്വതി സുരേഷ് പ്രസിഡന്റായും, സുജ രാജേഷ് സെക്രട്ടറിയായും കൂട്ടായി ബിന്ദു ബൈജു, നാജാ സുരേഷ്, സുബിന വിനീഷ് എന്നിവരുടെ കെട്ടുറപ്പുള്ള കൂട്ടാണ് ഇവരുടെ ഓരോരുത്തരുടെയും കരുത്ത്.
ജന്മഭൂമി ഓണ്ലൈന്