കൊല്ലം: സംസ്ഥാന സര്ക്കാര് പട്ടികജാതി വിദ്യാര്ത്ഥികളുടെ പഠന മികവിന് അഞ്ചാം ക്ലാസുമുതല് അയ്യങ്കാളിയുടെ പേരില് നല്കി വന്നിരുന്ന അയ്യങ്കാളി സ്കോളര്ഷിപ്പ് നിര്ത്തലാക്കി മത്സരപരീക്ഷയയുടെ അടിസ്ഥാനത്തില് നല്കാനുള്ള തീരുമാനം സ്കോളര്ഷിപ്പ് അട്ടിമറിക്കാനുള്ള സര്ക്കാരിന്റെ ഗൂഢാലോചനയുടെ ഭാഗമാണെന്ന് ബിജെപി പട്ടികജാതി മോര്ച്ച സംസ്ഥാന ജനറല് സെക്രട്ടറി ബി. ബബുല്ദേവ്.
മുന്പ് നാലാം ക്ലാസിലെയും ഉപജില്ലാ മത്സരങ്ങളിലെയും പ്രകടനത്തിന്റെ അടിസ്ഥാനത്തിലാണ് സ്കോളര്ഷിപ്പ് നല്കിയിരുന്നത്. വിദ്യാര്ഥികള് മെറിറ്റ് സര്ട്ടിഫിക്കറ്റുകള് സഹിതം പട്ടികജാതി, പട്ടികവര്ഗ വികസന വകുപ്പിന് അപേക്ഷ നല്കുകയായിരുന്നു പതിവ്.
പൊതുവിജ്ഞാനത്തെ അടിസ്ഥാനമാക്കിയുള്ള മത്സരപ്പരീക്ഷ 24ന് എല്ലാ ജില്ലകളിലും നടത്തുവാന് തീരുമാനം സര്ക്കാര് തലത്തില് എടുത്തിരുന്നുവെങ്കിലും വേണ്ട ആലോചനകളോ നിര്ദേശങ്ങളോ വിദ്യാര്ത്ഥികള്ക്കും രക്ഷിതകള്ക്കും ലഭിച്ചിരുന്നില്ല. ഹാള് ടിക്കറ്റ് കൈപ്പറ്റാന് പട്ടികജാതി, പട്ടികവര്ഗ വികസന ഓഫീസില്നിന്നും വിളിച്ചറിയിച്ചപ്പോഴാണ് പലരും വിവരമറിഞ്ഞത്. വിദ്യാര്ഥികള് ബുധനാഴ്ച വൈകിട്ടു 3ന് മുന്പ് ഹാള്ടിക്കറ്റ് കൈപ്പറ്റാനാണ് പട്ടികജാതി വര്ഗ്ഗ ജില്ലാ ഓഫീസില് നിന്നും നിര്ദേശം ലഭിച്ചത്. എന്നാല് ബ്ലോക്ക് വഴി അപേക്ഷ ലഭിച്ച വിദ്യാര്ത്ഥികള്ക്കു ബ്ലോക്ക്തലത്തില് നിന്നും ഹാള്ടിക്കറ്റ് എത്തിച്ചു നല്കുമെന്ന് പറഞ്ഞിരുന്നുവെങ്കിലും വിദ്യാര്ത്ഥികള്ക്ക് ഹാള്ടിക്കറ്റ് ലഭ്യമായിട്ടില്ല.
2021 മുതല് കൃത്യമായി പട്ടികജാതി വിദ്യാര്ത്ഥികളുടെ ലംപ്സംഗ്രാന്ഡ് സ്റ്റൈപ്പന്റ് എന്നിവ വിതരണം ചെയ്യുന്നതിലെ അപാകതകള് പോലും പരിഹരിക്കാന് പട്ടികജാതിക്കാരുടെ സര്ക്കാരെന്ന് സ്വയം അവകാശപ്പെടുന്ന ഇടതുസര്ക്കാരിന് കേരളത്തില് കഴിയുന്നില്ലെന്നും പട്ടികജാതി മോര്ച്ച ആരോപിച്ചു.
