തിരുവനന്തപുരം: യെമനില് വധശിക്ഷയ്ക്ക് വിധിക്കപ്പെട്ട് ജയിലില് കഴിയുന്ന മലയാളി നഴ്സ് നിമിഷ പ്രിയയുടെ മോചനദ്രവ്യം നല്കാനെന്ന പേരില് വ്യാജപണപ്പിരിവ് നടത്തുന്നുവെന്ന് ആരോപിച്ച് മുഖ്യമന്ത്രിക്ക് പരാതി. ഇവാഞ്ചലിസ്റ്റും ഗ്ലോബല് പീസ് ഇനിഷ്യേറ്റീവ് സ്ഥാപകനുമായ കെ.എ.പോളിനെതിരെയാണ് സുപ്രീംകോടതി അഭിഭാഷകന് അഡ്വ.സുഭാഷ് ചന്ദ്രന് പരാതി നല്കിയത്.
ചൊവ്വാഴ്ച കെ.എ.പോളിന്റെ എക്സ് അക്കൗണ്ടില് നിന്നും നിമിഷപ്രിയയുടെ മോചനത്തിന് ആവശ്യമായ തുക വിദേശകാര്യമന്ത്രാലയത്തിന്റെ അക്കൗണ്ടിലേക്ക് സംഭാവന ചെയ്യണമെന്ന് കാട്ടി പോസ്റ്റ് വന്നിരുന്നു. 8.3 കോടി രൂപ വേണമെന്നാണ് പോസ്റ്റില് പറഞ്ഞിരുന്നത്.
ഇതു വ്യാജമാണെന്ന് കേന്ദ്ര വിദേശകാര്യ മന്ത്രാലയം വ്യക്തമാക്കി. നിമിഷപ്രിയയുടെ പേരില് കോടികള് പിരിച്ചെടുക്കാനുള്ള ശ്രമമാണ് പോള് നടത്തുന്നതെന്നാണ് നിമിഷ പ്രിയ ഇന്റര്നാഷണല് ആക്ഷന് കൗണ്സില് കുറ്റപ്പെടുത്തുന്നത്.
