ന്യൂഡല്ഹി : ഇന്ത്യക്ക് നേരെ പാകിസ്താന് പ്രധാനമന്ത്രി ഷഹബാസ് ഷെരീഫ് ഉയര്ത്തിയ ഭീഷണിക്ക് തിരിച്ചടിച്ച് ഹൈദരാബാദ് എംപിയും എഐഎംഐഎം അധ്യക്ഷനുമായ അസദുദ്ദീന് ഒവൈസി. ഇത്തരം ഭീഷണികള് ഇന്ത്യയില് വിലപ്പോവില്ല. പറഞ്ഞിടത്തോളവും ചെയ്തിടത്തോളവും മതി, ഇനി നിര്ത്തിക്കോളൂവെന്നാണ് ഒവൈസി പറയുന്നത് .
‘ ഞങ്ങളുടെ പക്കല് ബ്രഹ്മോസ് ഇപ്പോഴും ഉണ്ട്. ഒമ്പത് വ്യോമതാവളങ്ങള് ആക്രമിക്കപ്പെട്ടുവെന്ന വാര്ത്ത ലഭിക്കുമ്പോള് താന് നീന്തല് വേഷത്തിലായിരുന്നു എന്നാണ് ഷഹബാസ് ഷെരീഫ് പറഞ്ഞത്. അദ്ദേഹം ഇത്തരം അസംബന്ധങ്ങള് സംസാരിക്കരുത്. അദ്ദേഹം ഒരു രാജ്യത്തിന്റെ പ്രധാനമന്ത്രിയാണ്. ഇത്തരം ഭാഷയൊന്നും ഇന്ത്യയെ ബാധിക്കില്ല,’ ഒവൈസി പറഞ്ഞു.
‘ഇന്ത്യന് സര്ക്കാര് സിന്ധു നദീജല കരാര് താല്ക്കാലികമായി നിര്ത്തിവെച്ചിരിക്കുകയാണ്. നിങ്ങളുടെ രീതികള് തിരുത്തുന്നതിന് പകരം, നിങ്ങള് ഞങ്ങളെ ഭീഷണിപ്പെടുത്തുകയാണ്. ഇതൊന്നും ഇവിടെ വേണ്ട ,’ ഒവൈസി പറഞ്ഞു.
‘ശത്രുവിന് പാകിസ്താനില് നിന്ന് ഒരു തുള്ളി വെള്ളം പോലും തട്ടിയെടുക്കാന് കഴിയില്ല. ഞങ്ങളുടെ വെള്ളം തടയുമെന്ന് നിങ്ങള് ഭീഷണിപ്പെടുത്തി. അത്തരമൊരു നീക്കത്തിന് ശ്രമിച്ചാല്, നിങ്ങള് ഒരിക്കലും മറക്കാത്ത ഒരു പാഠം പാകിസ്ഥാന് പഠിപ്പിക്കും,’ എന്നാണ് ഇസ്ലാമാബാദില് ഒരു പരിപാടിക്കിടെ പാകിസ്താന് പ്രധാനമന്ത്രി പറഞ്ഞത്.
