കൊച്ചി: മര്യാദാപുരുഷോത്തമനായ ശ്രീരാമചന്ദ്രന്റെ ചരിതം പാടുവാന് ആയിരം വിദ്യാര്ത്ഥികള് ഒത്തുചേര്ന്നത് രാമായണപാരായണത്തിലെ നവചരിത്രമായി മാറി. കോഴിക്കോട് വട്ടോളിയിലെ സനാതനം ധര്മ്മ പാഠശാലയുടെ ആഭിമുഖ്യത്തിലാണ് പാലാരിവട്ടത്ത് കണയന്നൂര് എസ്എന്ഡിപി യൂണിയന് ഹാളില് ശ്രീരാമരാജ്യം എന്ന പേരില് വ്യത്യസ്തമായ രാമായണ പാരായണം സംഘടിപ്പിച്ചത്.
14 ജില്ലകളില് നിന്ന് 78 ഗുരുക്കന്മാര് കഴിഞ്ഞ അഞ്ചുമാസമായി പരിശീലനം നല്കിയ ആയിരത്തില്പരം വിദ്യാര്ഥികളും അവരുടെ രക്ഷിതാക്കളുമാണ് അദ്ധ്യാത്മരാമായണം പാരായണം ചെയ്യുവാന് പാലാരിവട്ടത്തെ ഓഡിറ്റോറിയത്തില് ഒത്തുകൂടിയത്.
റിട്ട. ജില്ലാ ജഡ്ജി സുന്ദരന് ഗോവിന്ദ് ഉദ്ഘാടനം ചെയ്തു. സനാതനം ധര്മ്മ പാഠശാല അധ്യാപകന് രാജേഷ് നാദാപുരം അധ്യക്ഷനായി. വൈസ് ചെയര്മാന് പി.വി. അതികായന്, സനാതനം കൗണ്സിലിങ് അംഗം ഡോ. അനൂപ് വൈക്കം, പാഠശാലക്ക് തൃശ്ശൂരില് 20 സെന്റ് ഭൂമി ദാനം നല്കിയ മാണിക്കന് രാധാകൃഷ്ണന് എന്നിവര് സംസാരിച്ചു.
രാമായണത്തിലെ ബാലകാണ്ഡം മുതല് യുദ്ധകാണ്ഡം വരെയാണ് പാരായണം ചെയ്തത്. ഉച്ചയ്ക്ക് ശേഷം രാമായണത്തെ അധികരിച്ച് 14 ജില്ലകളുടെ നേതൃത്വത്തില് സാംസ്കാരിക സംഗീത സദസ്സ് നടന്നു.
ഭജന, ഗാനങ്ങള്, സംഗീതശില്പം, നൃത്തനൃത്യങ്ങള് എന്നിവ ഇതിന്റെ ഭാഗമായി അരങ്ങേറി. ജനറല് കണ്വീനര് വിദ്യാലാല് കൃതജ്ഞത പറഞ്ഞു.
