ഇസ്ലാമാബാദ് : ഓപ്പറേഷൻ സിന്ദൂരിൽ നിരാശരായ പാകിസ്ഥാന്റെ പുതിയ നീച പ്രവൃത്തികൾ ഓരോന്നായി പുറത്തുവന്നിരിക്കുന്നു. ഇസ്ലാമാബാദിലെ ഇന്ത്യൻ ഹൈക്കമ്മീഷനിൽ നിയമിച്ചിരിക്കുന്ന ഉദ്യോഗസ്ഥരോടും ജീവനക്കാരോടും പാക് ഭരണകൂടം പ്രതികാരം ചെയ്യാൻ തുടങ്ങിയിരിക്കുകയാണ്. ഇന്ത്യൻ നയതന്ത്രജ്ഞരുടെയും ജീവനക്കാരുടെയും വെള്ളം, ഗ്യാസ് തുടങ്ങിയ അടിസ്ഥാന ആവശ്യങ്ങൾ പോലും തടയാൻ പാകിസ്ഥാൻ ശ്രമിക്കുന്നുണ്ടെന്ന് റിപ്പോർട്ട് പറയുന്നു.
പൈപ്പ്ലൈൻ ഗ്യാസ് വിതരണം നിർത്തിവച്ചിരിക്കുകയാണെന്ന് ഇന്ത്യൻ ഉദ്യോഗസ്ഥർ പറയുന്നു. നയതന്ത്രജ്ഞരും അവരുടെ കുടുംബാംഗങ്ങളും വിപണിയിൽ നിന്നും ഉയർന്ന വിലയ്ക്ക് ഗ്യാസ് വാങ്ങേണ്ടിവരുന്ന അവസ്ഥയാണുള്ളത്. കൂടാതെ പായ്ക്ക് ചെയ്ത കുടിവെള്ളം പോലും ഇന്ത്യൻ ഉദ്യോഗസ്ഥർക്ക് വിതരണം ചെയ്യാൻ അവിടത്തെ പ്രാദേശിക കച്ചവടക്കാർ മടിക്കുന്നുണ്ട്.
കൂടാതെ ഹൈക്കമ്മീഷനിലെ ഉദ്യോഗസ്ഥരുടെയും ജീവനക്കാരുടെയും വീടുകളിൽ പത്രങ്ങൾ എത്തിക്കാൻ പോലും വിസമ്മതിക്കുന്നു. അതേസമയം പാകിസ്ഥാന്റെ ഈ പ്രവൃത്തി എംബസികളുടെ സുഗമമായ പ്രവർത്തനവും ജീവനക്കാരുടെ സുരക്ഷയും ബഹുമാനവും ഉറപ്പുനൽകുന്ന വിയന്ന കൺവെൻഷന്റെ നഗ്നമായ ലംഘനമാണ്.
ഇസ്ലാമാബാദിലെ ഇന്ത്യൻ ഹൈക്കമ്മീഷൻ പരിസരത്തേക്ക് ഗ്യാസ് വിതരണം ചെയ്യുന്നത് സുയി നോർത്തേൺ ഗ്യാസ് പൈപ്പ്ലൈൻസ് ലിമിറ്റഡ് (എസ്എൻജിപിഎൽ) ആണ്. എന്നിരുന്നാലും അതിന്റെ വിതരണം മനഃപൂർവ്വം നിർത്തിവച്ചിരിക്കുകയാണ്. ഇന്ത്യൻ ഹൈക്കമ്മീഷൻ ജീവനക്കാർക്ക് ഇത് വിൽക്കരുതെന്ന് പാകിസ്ഥാൻ അധികൃതർ പ്രാദേശിക എൽപിജി സിലിണ്ടർ വിൽപ്പനക്കാരെ ഭീഷണിപ്പെടുത്തിയിട്ടുണ്ട്.
അതേ സമയം 2019 ലെ പുൽവാമ ആക്രമണത്തിനും ബാലകോട്ട് വ്യോമാക്രമണത്തിനും ശേഷം ഇരു രാജ്യങ്ങളും തമ്മിൽ ഉന്നതതല ചർച്ചകൾ നടന്നിട്ടില്ല. സമീപ മാസങ്ങളിൽ ഓപ്പറേഷൻ സിന്ദൂരും സിന്ധു നദീജല ഉടമ്പടി കർശനമായി പാലിച്ചതും കാരണം സംഘർഷങ്ങൾ കൂടുതൽ വർധിച്ചിരിക്കുകയാണ്.
