ഹൃദയത്തിലോ ഹൃദയത്തിനു സമീപമോ കാൻസർ കോശങ്ങൾ അനിയന്ത്രിതമായി വളരുന്നതാണ് ഹാർട്ട് കാൻസർ. ഹൃദയത്തിൽ ആരംഭിക്കുന്ന കാൻസറിനെ പ്രൈമറി കാൻസർ എന്നു വിളിക്കുന്നു. ഇത് അവിടെ നിന്നും മറ്റ് പലയിടങ്ങളിലേക്കും വ്യാപിക്കുന്നു. കീമോതെറാപ്പിയും റേഡിയേഷനും ആണ് ചികിത്സ എങ്കിലും ഇത് പൂർണമായും സുഖപ്പെടുത്താനാവില്ല.
കാന്സർ ഹൃദയത്തെ ബാധിക്കുകയില്ല എന്നാണ് പലരും വിശ്വസിച്ചിരുന്നത് ഹാർട്ട് കാൻസർ അത്ര സാധാരണമല്ല. പ്രൈമറി ഹാർട്ട് കാൻസർ വളരെ അപൂർവമാണ്. കാർഡിയാക് ട്യൂമർ എന്നും അറിയപ്പെടുന്ന ഈ അവസ്ഥ, ശരീരത്തിലെ മൃദുകലകളിൽ ആരംഭിക്കുന്ന ഒരിനം കാൻസർ ആയ സർക്കോമ (sarcoma) ആയാണ് തുടങ്ങുന്നത്.
അടുത്തുള്ള എന്തെങ്കിലും അവയവത്തിൽ നിന്ന് കാൻസർ കോശങ്ങൾ ഹൃദയത്തിലേക്ക് വ്യാപിക്കുമ്പോഴാണ് ഹാർട്ട് കാൻസർ ഉണ്ടാകുന്നത്. ഇത് സെക്കൻഡറി ഹാർട്ട് കാൻസറിലേക്ക് നയിക്കുന്നു. പ്രധാനമായും ഇത് സ്തനങ്ങൾ, അന്നനാളം, ചർമം, ശ്വാസകോശം, വൃക്കകൾ എന്നിവയിൽ നിന്നും ഹൃദയത്തിലേക്ക് വ്യാപിക്കുന്നു. നെഞ്ചിൽ സ്ഥിതി ചെയ്യുന്ന തൈമസ് ഗ്ലാൻഡ്, ലിംഫാറ്റിക് സിസ്റ്റം, രക്തം എന്നിവിടങ്ങളിലെ കാൻസറുകളിൽ നിന്നും ഇത് ഹൃദയത്തിലേക്ക് വ്യാപിക്കാം.
വളരെ പെട്ടെന്നുണ്ടാകുന്ന ഹൃദയസ്തംഭനമാണ് ഹാർട്ട് കാൻസറിന്റെ പ്രധാന ലക്ഷണം. മിക്ക ആളുകൾക്കും ശ്വാസതടസ്സം, കടുത്ത ക്ഷീണം, തളർച്ച ഇവ അനുഭവപ്പെടാം. ഹൃദയ കാൻസറിന്റെ മറ്റ് ലക്ഷണങ്ങൾ ഇവയാണ്.
∙ഹൃദയമിടിപ്പ് വളരെ വേഗത്തിലാവുക അല്ലെങ്കിൽ ഹൃദയമിടിപ്പ് ക്രമരഹിതമാവുക (arrhythmia).
∙നെഞ്ചുവേദന
∙ബോധക്കേട്
∙പെരികാർഡിയൽ എഫ്യൂഷൻ– ഹൃദയത്തിനു ചുറ്റും കൂടുതലായി ഫ്ലൂയിഡിന്റെ സാന്നിധ്യം.
∙ശരീരഭാരം കുറയുക
∙കടുത്ത പുറംവേദന
∙ചുമച്ചു രക്തം തുപ്പുക
∙ഓർമക്കുറവ്
കീമോതെറാപ്പിയോ റേഡിയേഷൻ തെറാപ്പിയോ രണ്ടു ഒരുമിച്ചോ ചെയ്യുന്നത് ഹൃദയത്തിലെ ട്യൂമർ ചുരുങ്ങാനും ലക്ഷണങ്ങൾ കുറയാനും സഹായിക്കുമെന്ന് ഡോക്ടർമാർ പറയുന്നു.ട്യൂമറിന്റെ വലുപ്പം, അത് സ്ഥിതി ചെയ്യുന്ന സ്ഥലം, ഒപ്പം ആരോഗ്യം, പ്രായം ഇതെല്ലാം ആശ്രയിച്ചാകും ചികിത്സ. ട്യൂമർ സർജറി വഴി നീക്കം ചെയ്യാനും സാധിക്കും. സർജറി അതീവസങ്കീർണമായതിനാൽ ഏതെങ്കിലും സ്പെഷ്യാലിറ്റി സെന്ററിൽ ചെയ്യുന്നതാകും ഉചിതം. ഇതൊക്കെയാണെങ്കിലും ഹാർട്ട് കാൻസർ സുഖപ്പെടുത്താനാവില്ല എന്നാണ് ഡോക്ടർമാർ പറയുന്നത്.
