തിരുവനന്തപുരം: വരണ്ട മണ്ണിലേക്ക് പുതുമഴ വീഴുമ്പോള് ഉണ്ടാകുന്ന ഗന്ധം ഇനി എപ്പൊഴും ആസ്വദിക്കാം. ഗൃഹാതുരത്വം ഉണര്ത്തുന്ന ഇത്തരം ഗന്ധങ്ങള് സസ്യങ്ങളില് നിന്നും ഉണ്ടാക്കി അത്തറായി വിപണിയിലെത്തിക്കാന് ഒരുങ്ങുകയാണ് പാലോട് ജവഹര്ലാല് നെഹ്റു ട്രോപ്പിക്കല് ബൊട്ടാണിക്ക് ഗാര്ഡന് ആന്ഡ് റിസര്ച്ച് ഇന്സ്റ്റിറ്റ്യൂട്ട് .
ഉത്തര്പ്രദേശില് വികസിപ്പിച്ച ‘മിട്ടി കാ അത്തര്’ എന്ന വിലകൂടിയ അത്തറിനു പകരമായി താരതമ്യേന ചിലവു കുറഞ്ഞ രീതിയിലാണ് ഇന്സ്റ്റിറ്റ്യൂട്ട് അത്തര് വികസിപ്പിക്കുന്നത്. സൂര്യപ്രകാശത്തില് ഉണക്കിയ ചൂടുള്ള മണ്ണ് വാറ്റിയെടുത്താണ് ‘മിട്ടി കാ അത്തര്’ നിര്മിക്കുന്നത്. ഇതിന്റെ നിര്മാണ ചെലവ് കൂടുതലായതുകൊണ്ട് വിപണിയില് ഈടാക്കുന്നതും ഉയര്ന്ന തുകയാണ്. അതേസമയം പുതുമഴയുടെ ഗന്ധം സസ്യ സ്രോതസുകളില് നിന്ന് പുനര്നിര്മിക്കാന് കഴിയുമെന്നതാണ് റിസര്ച്ച് ഇന്സ്റ്റിറ്റിയൂിന്റെ കണ്ടെത്തലിന്റെ ഗുണം.
സ്ട്രെപ്റ്റോമൈസിസ് എന്ന ബാക്ടീരിയ ഉത്പാദിപ്പിക്കുന്ന ‘സെസ്ക്വിറ്റര്പീന് ജിയോസ്മിന്’ എന്ന ബാക്ടീരിയയാണ് മണ്ണിന്റെ സ്വഭാവഗുണമുള്ള മണത്തിന് കാരണമാകുന്നത്. മഴയ്ക്ക് ശേഷമുള്ള സവിശേഷമായ മണ്ണിന്റെ ഗന്ധം, സസ്യങ്ങളില് നിന്ന് പിടിച്ചെടുത്ത് ‘ട്രോപ്പിക്കല് സോയില് സെന്റ്’ എന്ന പേരിലാണ് ഇവ കുപ്പിയിലാക്കി വിപണിയിലെത്തിക്കാന് ഒരുങ്ങുന്നത്.
