തിരുവനന്തപുരം: സിനിമാ മേഖലയുമായി ബന്ധപ്പെട്ട ഒന്പതോളം വിഷയങ്ങള് സംസ്ഥാന സര്ക്കാരിന്റെ സിനിമാനയ രൂപീകരണത്തിന്റെ ഭാഗമായി സംഘടിപ്പിക്കുന്ന കേരള ഫിലിം പോളിസി കോണ്ക്ലേവില് ചര്ച്ച ചെയ്യുമെന്ന് സംസ്ഥാന ചലച്ചിത്ര വികസന കോര്പ്പറേഷന് ചെയര്മാനായി ചുമതലയേറ്റ കെ. മധു അറിയിച്ചു. ഓഗസ്റ്റ് 2, 3 തിയതികളില് കേരള നിയമസഭാ സമുച്ചയത്തിലെ ആര് ശങ്കരനാരായണന് തമ്പി മെമ്പേഴ്സ് ലോഞ്ചിലാണ് കോണ്ക്ലേവ്. ജര്മ്മനി, യുകെ, പോളണ്ട്, ശ്രീലങ്ക തുടങ്ങിയ രാജ്യങ്ങളില് നിന്നുള്ള ഫിലിം പ്രതിനിധികളുണ്ടാകും. എന്എഫ്ഡിസി മാനേജിങ് ഡയറക്ടര് പ്രകാശ് മഖ്തും, കെ ആര് നാരായണന് ഇന്സ്റ്റിറ്റ്യൂട്ട് ഡയറക്ടര് സയീദ് അക്തര് മിര്സ, സുഹാസിനി മണിരത്നം, ഹന്സല് മെഹ്ത, റസൂല് പൂക്കുട്ടി, ആശിഷ് കുല്കര്ണി, ഉദയ് കൗശിഷ്, സൊനാലി ബാവ, അഭിജിത് ദേശ്പാണ്ഡെ, രേവതി തുടങ്ങിയവര് പാനലിസ്റ്റുകളാകും. കോണ്ക്ലേവിനെ തുടര്ന്ന് സിനിമാനയത്തിന്റെ കരടുരൂപം കാലതാമസം കൂടാതെ പ്രസിദ്ധീകരിക്കാനാണ് സര്ക്കാര് ലക്ഷ്യമിടുന്നത്.
