തിരുവനന്തപുരം: കേരള സര്വകലാശാലയില് രജിസ്ട്രാര് സ്ഥാനത്ത് നിന്ന് സസ്പന്ഡ് ചെയ്തിട്ടും ഓഫീസിലെത്തുന്ന ഡോ. കെ.എസ്.അനില്കുമാറിന് ഫയല് നല്കരുതെന്ന് നിര്ദേശിച്ച് വീണ്ടും ഉത്തരവിറക്കി വിസി മോഹനന് കുന്നുമ്മേല്. ഫയല് കൈമാറിയാല് ചട്ടലംഘനമായി കണക്കാക്കുമെന്ന് ഉത്തരവില് പറയുന്നു.
ഭാരതാംബ വിവാദത്തിലാണ് വിസിയും രജിസ്ട്രാറും തമ്മിലുള്ള തര്ക്കം തുടങ്ങിയത്.ഗവര്ണറെ അപമാനിച്ചെന്ന് കാട്ടി വി സി, രജിസ്ട്രാറെ സര്വീസില് നിന്നും സസ്പെന്ഡ് ചെയ്തിരുന്നു. എന്നാല് ജൂലായ് ആറിന് ഇടത് ഭൂരിപക്ഷമുളള സിന്ഡിക്കേറ്റ് അംഗങ്ങള് അനില്കുമാറിന്റെ സസ്പെന്ഷന് പിന്വലിച്ചു.എന്നാല് ഇത് നിയമവിരുദ്ധമാണെന്ന് വി സി നിലപാടെടുത്തു.
സസ്പെന്ഡ് ചെയ്ത രജിസ്ട്രാര് കെ.എസ്.അനില്കുമാറിന്റെ ശമ്പളം തടഞ്ഞു വയ്ക്കാന് വിസി ഫൈനാന്സ് ഓഫീസര്ക്ക് നിര്ദ്ദേശം നല്കിയിരുന്നു.ഇദ്ദേഹം സര്വകലാശാലയുടെ കാര് ഉപയോഗിക്കുന്നതും വി സി തടഞ്ഞെങ്കിലും ഇടത് സിന്ഡിക്കേറ്റംഗങ്ങളുടെ പിന്തുണയുളള ഡോ കെ എസ് അനില്കുമാര് ഇതൊന്നും നടപ്പിലാക്കാന് അനുവദിക്കാതെ തുടരുകയാണ്.
