തിരുവനന്തപുരം: എഡിജിപി എം.ആര് അജിത്കുമാറിനെ പൊലീസില് നിന്ന് മാറ്റി എക്സൈസ് കമ്മിഷണറായി നിയമിച്ചു.ശബരിമല ദര്ശനത്തിന് പമ്പയില് നിന്ന് ട്രാക്ടര് ഉപയോഗിച്ചതിന് എം .ആര് അജിത്കുമാറിനെതിരെ നടപടിക്ക് ഡി.ജി.പി ശുപാര്ശ ചെയ്തിരുന്നു.
നിലവില് ബറ്റാലിയന് എഡിജിപിയാണ് എംആര് അജിത്കുമാര്.ട്രാക്ടര് യാത്രയില് അജിത് കുമാറിന്റെ വിശദീകരണം തൃപ്തികരമല്ലെന്നാണ് ഡിജിപി റിപ്പോര്ട്ട് നല്കിയത്.എഡിജിപി അജിത് കുമാറിനെതിരെ നടപടി സ്വീകരിച്ച ശേഷം ഹൈക്കോടതിയെ അറിയിക്കുന്നതാണ് ഉചിതമെന്നും ഡിജിപി സര്ക്കാരിനെ അറിയിച്ചിരുന്നു.
അതേസമയം, കാലു വേദന കൊണ്ടാണ് ട്രാക്ടറില് കയറിയതെന്നായിരുന്നു അജിത് കുമാര് വിശദീകരണം നല്കിയത്.പമ്പ ഗണപതി ക്ഷേത്രത്തില് തൊഴുത എം.ആര്.അജിത് കുമാര് സ്വാമി അയ്യപ്പന് റോഡിലൂടെ കുറച്ചുദൂരം നടന്ന ശേഷം പൊലീസിന്റെ ഉടമസ്ഥതയിലുള്ള ട്രാക്ടറിലേക്ക് കയറി. സിസിടിവി ക്യാമറകള് പ്രവര്ത്തിക്കാത്ത ഇടത്തായിരുന്നു എഡിജിപിയുടെ നിയമ വിരുദ്ധ ട്രാക്ടര് യാത്ര.
അജിത് കുമാറിന്റെ ട്രാക്ടര് യാത്രയില് ഹൈക്കോടതി രൂക്ഷ വിമര്ശനം നടത്തിയിരുന്നു.സാധന സാമഗ്രികള് കൊണ്ടുപോകാനാണ് ശബരിമലയില് ട്രാക്ടര് ഉപയോഗിക്കാന് അനുമതി.
